【曾智華專欄】有關行善的劣等人

周一本欄《若梁朝偉都做得到⋯⋯》刊出後，引起相當多迴響，主因內裏的兩位主角郭富城及梁朝偉，皆影帝級巨星，一舉一動都備受關注，有龐大影響力。

兩位善行本冇人知，我爆，因深感若個個行善都話低調、唔想畀人覺得沽名釣譽的話，就認真「嘥料」。

嘥乜料？人類社會，任何行為都會產生互為影響之力，尤其有頭有面有公信力者，肯號召，會出現很大的推動力。

這個正正是所有公益活動皆邀請公眾偶像擔任代言人之因，能以一人之力，喚起千百人跟隨。小弟長期從事傳媒工作，最清楚這種運作。事實，我在香港電台工作數十年，曾策劃過無數慈善活動，每次皆有目標，例如要幫到幾多老弱傷殘及籌得多少捐款。

久而久之，察覺相關行善的有三等人：一、上等，不停行善，從不宣揚，因想低調靜靜地做；二、中等，行善要求有回報，例如在海報大大個名印出，節目內要公讀乜博士、物總理捐幾多，又或成棟建築物用佢個名命名；三、乜都唔捐唔支持，淨識嘴藐藐話第二種人沽名釣譽，並非真心行善。

三種人之中，最劣等為第三種冇品人，見之就想兜巴星。

至於第二種，相當多，我會接受佢哋沽名釣譽。點解？因任何善舉，最終目標是有幾多不幸者受惠，所以，越多人「有動機地」或因「沽名釣譽」行善，越易令善舉盡快達到甚或超越目標，這個絕對是以「目標為本」。

至於第一種，希望佢哋唔介意畀人知，因這會製造出強大領頭感染力，令你捐佢又捐之下，在社會中產生行善羊群效應，最終弱勢社群大大得益，這就最理想了。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。