【曾智華專欄】羅淑佩絕不可手軟

新聞統籌專員謝振中上任前，傳媒介紹佢時多用一條片，正是謝專員幾年前的名句：「香港，並冇法外之地。任何人士在任何地方犯法，警方就必定會執法。」是否真能百分百做到，大家心照，但這種精神，作為執法者，必須貫徹。

好啦，咁就引入今日想講的一個現實情況，相信大家皆想睇睇政府會點出手。

係乜？正是房屋署署長羅淑佩上任時宣布，嚴打濫用公屋，因公屋是由納稅人負擔的珍貴資源，只供真正有需要的弱勢社群入住。這條界線非常鮮明，故此必須抽出濫用及完全無需要而霸住公屋者，犯法的就刑事檢控，經濟已大大改善的，也請自動交回單位。因貧苦大眾條龍N咁長。這個政策並不針對任何人，只針對事。

羅署長在官場中著名「嘭嘭聲」，心口有個「勇」字，絕不似個別老油條高官，兩個膊頭搽咗成擔花生油，乜都卸。

事實，佢在打擊濫用公屋方面，成效極之顯著，2023/2024年度已經收回近二千八百個單位，較兩年前大增逾倍（究竟上任署長會否有點汗顏呢？）。

不過，唔好歡喜住，因今年4月展開的租戶申報計劃，到5月底截止時，竟有近六成膽敢唔申報，即係點？即係擺明唔依規矩做事，你有你要求，我有我懶睬。

若如此態度可以過骨，仲成世界？（你試吓唔報稅？）但面對十幾萬戶唔合作，乃似一道銅牆鐵壁，要將其拆掉，艱難度可以想像。

不過，這似乎開正羅淑佩的迎難而上性格，越難的任務，能完成，會越有成就感！

小弟作為納稅人，對濫用公屋者態度是零容忍，故瞓身支持羅署長「有法必執」，切不可手軟！