【曾智華專欄】極厲害的「抽血員」

一年兩次，又要到QE抽幾筒血化驗，照舊冇食早餐、冇食藥，準時八時三十分殺到專科大樓。門口有條龍，重門深鎖，保安再三呼籲大家排隊：「九點先開，九點先開。」

咦，乜搬咗龍門喎！因早幾年八時三十分來到，已經開始抽血。早點開門，畀機會坐輪椅及行動不便長者（絕大部分）有個位坐低等候，實屬德政。尤其如今夏季，悶熱之外，更惡蚊亂飛兼有機會傾盆大雨。

究竟邊個負責人突然落Order Cut鐘呢？

小弟當然也是「排隊長者」之一。邊排邊「祈禱」：「唔該綠衫，唔好橙衫！」

乜意思？因QE有約十個抽血員同時開工，當中約八、九個是橙衫，即Junior啩，雖則個個斯文靚女，但到底是「生手」。我過去三十年抽血生涯中，凡遇上橙衫，有一半時間痛到飛起。最弊幾次，撞正經驗不足，連一眼已可看到的「老血管」（即抽過N咁多次）針孔也矇查查，結果篤完又再篤都唔中，真係嬲佢唔知，話佢唔好意思。故此，次次抽血，我都𠵱𠵱噚噚：「唔該中綠色，唔該中綠色」。

可能誠心祈求有回應，前天果然「中綠」，舒服晒。一位近五十的「老手」，輕輕一篤搞掂，幾乎冇痛楚感覺。不過，排隊及抽血時，見一位白衫阿嬸，負查收血的，似乎當天神志不寧，捧住幾十筒血跌跌撞撞，究竟有冇撈亂呢？

這點，有勞QE抽血部總管留意，若員工健康出問題，安排佢休息好了。

抽完血，食個靚早餐，再漫步到高山劇場公園晨運，急步後開始拉筋。

拉筋，自然個人企定定。嘩，說時遲，那時快，望望大腿，哎吔吔，死咯，原來已有兩隻肥蚊食飽飽成肚血，仍未抽針！點解佢哋落針時，我全無感覺的呢？若抽血姑娘有咁手勢就發達嘞！