【曾智華專欄】唔好向我講對唔住

上周日「浪漫勇士」橫掃日本，將安田紀念賽冠軍摘下，衝線一刻，馬迷必定無比興奮（其實任何香港人也應如此）。無他，過去二十年能令香港人感到驕傲，可以挺起胸膛向全世界宣稱「我好掂」的人、事、物，冇乜幾多㗎。故此，今鋪有點「吐一口烏氣」之感，希望政府懂得食住個勢，大事宣揚一番。

呢場賽事，小弟頗多觀察，頗堪一記：

一、男人最光芒一刻。肯定練馬師沈集成興奮到爆炸，因佢真真正正由底層捱到今日頂峰，故此，肉緊地拖埋老婆上頒獎台，當佢高舉雙手慶祝時，老婆大人默默用引以為傲的眼神望住老公，甜到漏！

二、沈集成接受訪問，不忘道謝逝世恩師愛倫，當年佢出任副練，正是被愛倫一絲不苟的堅持所感染，其中深深長記的一句，正是：「唔好同我講對唔住！」

呢句，小弟昔日上司也是口頭訓令：「你坐得呢個位，有權有責將一切專業地完成，我唔想聽你解釋，切勿成日講對唔住，專業世界內，冇人想知你點解失敗！」

係咪當頭棒喝？到小弟主管一個台時，也是經常有年輕同事失場、遲到、蝦碌⋯⋯然後，成條死魚咁話：「碌Sir，對唔住！」

若你一次、兩次、三次接受，咁你就成個團隊變「對唔住大隊」，散晒！

今晚研究兩場三班千二米。

第八場買「愛馬善」，第一，感情分，要為弱家鄭俊偉打氣，希望佢及時上岸。大佬，努力一生，若臨退休才被釘牌，真係好難接受。「愛馬善」今季鬥志驚人，出十一次五Q兩P，但仍未能出頭。今場我瞓身替佢打氣！

第九場我捧「歡樂至寶」，呂健威正在衝冠，不會手軟，此馬上季兩出快活谷千二全W，今晚再亮劍！