【曾智華專欄】最受歡迎騎師——冇

今季冠軍練馬師鬥得燦爛，伍鵬志早早大幅領先，幾個月前本來蔡約翰有機會追近，點知佢跑跑吓好似唔多想玩，越墮越後，以「走地盤」計，小弟認為呂健威會過頭。

套用跑法，一隻馬全程狂放，原本贏十幾個馬位，但入直路有另一隻如飛殺上，越追越近，最後五十米經已平頭。論氣勢，當然後上馬著數，睇住你嚟食，且看中否。

至於冠軍騎師，講都嘥氣，因早由「軟硬鞭」玩晒，大勝幾條街，無敵是最寂寞，如此打橫行失晒平衡，馬會高層點睇？

好嘞，另一個比冠軍名銜更重要的「最受歡迎騎師」又如何？此乃真真正正馬迷心目中的冠軍，民意誠心支持也。

今年何澤堯肯定冇機會嘞，「田雞」如何？騎功未夠，差少少。「伸縮文」布文又如何？近月開始在陣上伸伸縮縮，點會最受歡迎呀？

計我話，今年應該取消頒獎！一如諾貝爾獎及香港傑出青年銜，冇就冇，咪夾硬搵個二打六頂！

不過，若可以選非長駐騎師的話，咁就有，一定係麥道朗當選，根本冇得揮，單睇佢面上股正氣已經贏晒，唔使解釋。再者，以其現今世界頂級騎功，早早通過「浪漫勇士」俘虜每位香港馬迷的心了。

今天黃昏馬，主攻研究第六場第三班千二米草地。

擂台躉當然是「龍之輝」，上次輕風送爽，收韁勝兩個幾馬位，兵不血刃，結果被重手加十分！點解贏咁盡？唔多明。今次又必熱到冇味，但一定要跟，呂健威在搏命也。

呢場買大熱Q嘥氣，不如飛起二三熱，然後一拖七。我會特別留意「富貴駒」這匹愛爾蘭馬，在海外出一次即W，速速運港。賀賢早早卜定巴度執韁，且看會否一鳴驚人嘞！