【曾智華專欄】一定炮製場大龍鳳

世事好多時會重複又重複發生，所以，只要有經驗、有記憶力，又有超人紀律性，如此在不少「競技場」，你都會跑贏。因大部分人對大部分事毫不上心，渾渾噩噩、符符碌碌也。

兩年前的世界盃，小弟在本欄大大聲忠告：「各位欲參與外圍者留意，警方必定大力掃蕩，勿存僥倖之心以身試法。」結果拉咗過千人！

簡單，香港賭外圍屬犯法，在香港買外地的外圍也犯法，一切皆為保護香港的博彩稅。對，警方不是神，不可能全面對付所有外圍，不過，你係警務處處長，在風頭火勢期，必定會來次「示範表演」，高調宣示——當我冇到者，必定殺無赦。

眾所周知，凡開世界盃，就是全球外圍最瘋狂日子。其次，就是歐洲國家盃，因球壇巨星排隊上陣也。周二本報頭條《外圍網瞄準歐國盃，泰達幣落注吸港客》，外圍賭博網站肆無忌憚明刀明槍宣傳，拉攏港人非法賭博，意圖用最新科技及虛擬貨幣逃過偵查，以在香港挖走巨額賭資，連繫的，當然包括販毒、洗黑錢等勾當。

馬會其實早部署龐大情報網，完全掌握其外圍佬手法及蹤跡，不過，冇執法權力。簡單，一於與警方攜手，6月15日前來次「大龍鳳」，高調拉人封艇。

各位，投注，經馬會又安全又合法，更可間接納稅做善事，為乜咁蠢犯法賭外圍博拉呢？有讀過經濟學的，應知這個「機會成本」完全唔合比例噃。　

今日跑沙田，睇呂健威報名陣容，擺明鍊盡爭冠軍練馬師。第七場二班千二米放出已連贏四場的鎮倉之寶「合夥奔馳」，意向鮮明，對手只有「華麗再勝」及「晶晶日上」，其他馬好難過到呢三匹，冇得爆冷喇。