【曾智華專欄】馬會及王張必須硬食

無論怎麼變，香港仍大致上是個崇尚言論自由社會。雖然某啲範圍空間已經收窄（希望隨時日及形勢轉變有所改善），但很多關於公眾的人事物若出問題，大家仍可自由發聲「說三道四」。

例如最近，日日有人批評香港大學校委會主席王沛詩、校長張翔及馬會，全皆冇得唔面對，涉及眾人的事，自然Bound To Be Criticised及會有Check and Balance。

王沛詩及張翔乃公職人物，被指弄權及搞到校政一片混亂，最佳解決方法不是單方面否認，而應是光明磊落地來一次直播解釋，透透明明將「鬧劇」結束。公眾眼睛雪亮，自會判斷。若繼續拖拖拉拉，只會令香港大學這最高學府聲譽進一步受損！

馬會又如何？一樣正面對猛烈批評，包括亂搬龍門，向五班惡例跪低⋯⋯

馬會雖云是「私人會所」，但你知我知，講法荒謬，因馬會受盡政府政策傾斜保護（不准競爭、獨家開賭、廉價批地），當然，馬會的存在，對政府也天大有利。最近馬會打倒昨日的我，臨季尾才裙拉褲甩修改遊戲規則，點解？唔使明眼人都睇到，「唔修唔得」也。

其實幾年前唔知邊個蠶蟲師爺度出，練馬師五班頭馬達到一定數量後唔計，早引起群情反彈，噓聲四起。當時馬會用權威將民意壓下去，如今則死死氣打倒昨日的我，你想唔被群起攻擊？有冇咁天真？

今晚第八場三班一千米肯定精彩，因十一匹參賽馬，七匹有機會，包括「財才」、「綠色好威」、「英雄豪邁」、「武千帥」、「天火同人」、「顏色王子」及「年少多好」。決勝因素在各駒排位及陣上形勢，好大機會成棚馬齊齊衝過終點！

我取「年少多好」、「綠色好威」及「天火同人」！買Q及PQ啦！