【曾智華專欄】絕不手軟，過九成交表

公務員有好多種，有啲充滿使命感，有的大蛇躺平，有如一個社會縮影，全世界皆如是。

所以，不應一竹篙打一船人，在任何領域，其實乜人都有，要求公平點。

最近不少人議論公務員加薪三巴仙（不少再有增薪點），工會當然話：「影響士氣！」

呢句影響士氣，好多老友唔明，拉我問：「碌Sir，你做過幾十年公務員，一定知乜叫士氣，打政府工，幾時會有士氣？幾時會冇士氣？點解畀多啲就嘭嘭聲有士氣？因應經濟形勢要共渡時艱就話冇士氣？呢個講法，絕少在私人機構聽見噃，幾『獨家』呀吓！」

「唔好問小弟，我乃奇怪動物，打咗三十幾年政府工，冇一日會冇士氣！總之，好似張建忠名言——有工返就開心，多謝上天畀多日。」

所以，由我答做公務員應該幾時冇士氣，簡直緣木求魚。

上周四本欄標題——《羅淑佩絕不可手軟》，文章一出立即有反應，晨早發言人即回覆：「其實交咗申報表的公屋戶，已經超過九成！同事非常努力，效果鮮明。」

點解房屋署的同事會追表時士氣如此高昂呢？竟可追到九成幾戶「唔敢唔交表」？佢哋有冇多過三個巴仙人工加？當然有！真想問問「前仆後繼」追表追到躺平公屋戶冇氣唞的公務員。

收完表，只是第一步，下一步當然是抽出濫用戶，研究起訴或趕走，無得手軟。

至於公屋富戶，又是另一類處理個案。聽講風聲咁緊，不少富戶知道今次政府嚟真，開始唔敢硬碰。

成個走勢看，真是排隊上樓的窮苦家庭大喜訊，因條龍會縮短好多，不用再住劏房甚或露宿，這正正是我等納稅人真金白銀夾錢起公屋的目標。