【曾智華專欄】自戀狂導遊

旅遊大灣區，覓美食，當然要事先做足資料蒐集，然後拜託當地導遊安排。
　　
旅行團導遊，工作角色清晰，由團抵埗迎接開始，令所有團友安心，賓至如歸，協助人人解決沿途問題。食肆景點預早安排妥當，以確保冇甩漏。之外就是在車上「娛賓」，包括講典故及笑話，間中可以唱首歌仔，總之就是令大家開開心心完成旅程。
　　
導遊絕對唔易做，因團團客人「品種」不同，各有性格、喜好及情緒，有的孤寒，有的大方，有的具修養，有的爛撻撻，故此，成功導遊絕對是個超級公關，手段之圓滑非比尋常。
　　
小弟年輕時慣性跟團旅遊，撞上的導遊起碼幾十個。有趣，上周到順德旅遊，碰上的竟是非常新鮮的一種——自戀狂！
　　
超級搞笑，佢一上旅遊車開咪，就話：「各位，我叫阿紅，人人話我似鍾楚紅！」
　　
起初大家以為佢搞爛Gag，故此應酬式回報一下：「係喎，真係好靚女喎！」
　　
點知原來錯！佢見大家咁反應，進一步狂讚自己，要幾肉麻有幾肉麻：「其實有次我參觀博物館，見到著名的宋家三姊妹相，咦⋯⋯乜原來宋慶齡同我有八成似，於是立即企埋展覽相旁合照，拎返屋企畀阿媽睇，佢都話真係好似啊，大家可以傳閱㗎！」
　　
真真頂佢唔順，做導遊做到可以咁，簡直大開眼界。不過，原來未完，更「大鑊」跟住上。
　　
紅姑面都唔紅話：「好多朋友認為我其實可以做粵劇名伶㗎。嗱，咁吖，等我播一首《萬惡淫為首》畀大家欣賞吓，唱腔唔差過新馬師曾㗎！」
　　
喂，佢並非講笑，原來嚟真，跟住播出大鑼大鼓用哀怨腔口演繹《萬惡淫為首》錄音。
　　
紅姑究竟知唔知，其實自己係做乜的呢？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。