【曾智華專欄】阿楊演唱一票難求

上周上世紀七十年代廣播女神俞琤（YT）七十大壽，包下中環名人蒲點SEVVA大事慶祝，傳出的相片，顯示當晚全城名人半傾巢而出，各路英雄紛紛畀面，有人笑謂，今時今日就算特首做大壽，也不會有「咁多種」人馬肯一齊出席，可知YT雖然退隱多時，但江湖地位仍未褪色也。
　　
講起俞琤，電台迷一定諗起當年佢領軍的商台，與港台日日開戰，佢隊Team統稱「六啤半」，力抗香港電台吳錫輝任大統帥的《青春交響曲》。
　　
小弟剛剛掹到車邊，也曾是《青春》的一員，故有幸參與兩軍鬥法，其時大家搏命時，個個不會講薪酬、福利、假期⋯⋯總之，有得參戰已是個人榮耀，一於與「敵方」死過。由此，創造出香港的電台一個最輝煌年代，光芒不讓電視專美。
　　
商台的「六啤半」名字，由誰創作的呢？兩位，一是俞琤，另一是楊振耀（阿楊、楊大俠）。
　　
上世紀七十年代時，佢兩個仿似孖公仔，一個做女王，一個做丞相，前者運籌帷幄，釐定戰略，訓練將領。後者專度「橋」，多個角度分析戰情，可正路，可邪門。
　　
有一日，兩人為度商台大軍名稱，走咗去行沙灘，行行吓就諗出「六啤半」。
　　
可惜近月阿楊移民澳洲，無緣親賀YT大壽，實屬不美，否則，兩人同年，可一齊再搞大啲也。
　　
不過，冇問題，楊大俠已定5月底回港，逗留幾星期，搞乜？出席一個十周年晚宴，當晚佢會開個人迷你演唱會，唱足一小時。
　　
圈內圈外冇乜人知阿楊唱功幾勁，其實佢聲線溫柔軟糯帶淒美，故演繹林子祥、張國榮⋯⋯等慢歌，真真一聽就電暈。
　　
大家有冇得聽？冇！因佢演唱會消息一出，一百五十人的場地即爆瀉，一票難求也。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。