【曾智華專欄】一於只捧自己友

近期馬圈有兩單嘢引起不少人談論：一、點解如今賽事，頻頻延遲開閘？二、點解個別名人會員被馬會「貼堂」，吊銷會籍？
　　
先講賽事延遲，好似已成慣性，小小事（可能幕後認為大大事）都分分鐘延遲五分鐘。
　　
大家可知如今香港的彩池有不少為匯合彩池，外地大戶（會否部分由香港出口轉內銷？）未到開閘最後一刻，死忍唔撳掣落大飛，費事比普羅馬迷捉到手影，跟進分薄派彩。
　　
究竟馬會高層會否也因洞悉玄機，為引海外大戶繼續重錘，比多幾分鐘佢哋「出血」呢？
　　
答案無人知。唯一個個知，是馬會頂層花紅與投注額掛鈎，越多全球賭仔瞓身「踴躍捐輸」，佢哋年尾荷包越腫脹。這個事實，會否變成「唔覺意」經常延遲開閘呢？你問我，我問邊個？
　　
另一單也有少少稀奇，就是在馬會會所告示板上，有知名會員貼堂。乜事？正是被馬會吊銷會籍。
　　
正常會員，若果因任何原因唔玩，易，通知一聲馬會退出，絕對冇人會公布。
　　
如今搞到公布，當然係有人「發生咗事」。馬會會員也是人，也好奇八卦，故不少人會慣性睇睇最新邊個被「貼堂」？慘，最新上榜的，包括名醫富豪（前？），個個曾經非常風光。
　　
顯示近年一個經濟巨浪，無論前巨富或名醫會員，不少也被沒頂。
　　
明日又到興奮日，因舉行馬王大賽，三場一級賽同日舉行，所有香港「王者」傾巢而出，力抗海外來犯的十一匹明星馬。
　　
小弟在這日子，不再作任何研究了，一於只捧自己友，用高分幾匹Win過關。二千米選「浪漫勇士」、「大至尊」，千六米選「金鎗六十」、「遨遊氣泡」，千二米選「加州星球」、「維港智能」。支持香港隊！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。