【曾智華專欄】飽到暈低要抬走

香港極多日本菜迷，大部分鍾情食Omakase，即無菜單料理，由主廚決定內容，不時不食，看看當日有乜新鮮就食乜也。
　　
今時今日要在香港歎一頓像樣的廚師發辦，收費隨時「深不可測」，就似入咗香港著名「富豪醫院」一樣，出院才知「傷口有幾深」！所以，大部分日本菜迷皆趁港元高企，撲去日本或台灣狂食，因平足一半！
　　
Omakase本為日本食制，但小弟前晚得到老友楊醫生引領，來了一頓極精彩的廣東菜廚師發辦。
　　
楊醫生乃著名食家，正牌唔正唔食一族，加上病人眾多，偶會撞上頂級名廚，其中一位正是名震粉嶺的「新漢記」老闆兼名廚漢哥。漢哥巴閉在凡熟客使得起錢的，一律無菜單，總之，佢話食乜就食乜。
　　
基於江湖地位夠兼搭通天地線，漢哥每日皆親身走訪各大市場及聯繫內地買手，有乜正嘢，先留貨並第一時間通知。
　　
聽漢哥大名久矣，但基於「新漢記」在粉嶺聯和墟，我去起碼超過一小時，搭港鐵要轉車，又冇巴士到，由九龍出發未免太煩，故從未去過。
　　
如今楊醫生號召，話明必有靚嘢食，咁去就去啦，「為食敢死隊」十大漢，準時殺入粉嶺。
　　
呢餐食咗乜？講出嚇親，包括：白烚黑毛豬蹄筋、金牌蝦醬骨、豆醬炒青瓜苗、手打九棍魚餅、水果芹菜、麻辣牛胸油、鹽水鵝、鹽焗野生大花螺、蒸鮮搓墨魚丸、紅葱爆連墨汁鮮吊桶（一啖噴墨，險！）……至此，老友，只食完頭盤矣，老老實實，我已經開始頂唔順，要走出街外唞唞氣，慢跑一個圈消化消化。
　　
跟住上仲有三斤半野生星斑、潮州魚翅、白切新鮮走地雞、爆膏奄仔蟹、甜品⋯⋯
　　
結果，幾乎暈低要抬走。