【曾智華專欄】平嘢冇好？

傳統智慧，平嘢冇好，好嘢冇平！
　　
係真唔係真？真咗八成啦。唔使辯論，人生經驗自然會話你知，當一樣嘢「太平」，去到Too Good To Be True時，咁你就要小心啦。正所謂邊有咁大隻蛤乸隨街跳？
　　
尤其食海鮮。小弟認識的鯉魚門海鮮店老闆肥B，酒後拉我講：「碌Sir，千祈咪信靚海鮮有平嘢呀。想平？得！食『遊客海鮮』囉！」
　　
乜叫「遊客海鮮」？即係平價團遊客食的海鮮。
　　
「嗱，一手海鮮來，通常分三級狀態。第一級，新鮮生猛；第二級，呆呆哋，未死，但有多少『慢走』，應該嗰頭近；第三級，唔係海鮮，係神仙，即係瓜咗。做生意，樣樣都講錢，用得當然唔掉。神仙海鮮，用大量調味品，胡椒粉、雞粉、鹽、梳打粉⋯⋯ 總之搞到佢冇腥味，然後上脆漿炸之，再加酸甜汁，如此，鬼佬遊客一定食到嗒糖㗎！」
　　
今日標題講「平嘢冇好」，若放在馬圈又如何？
　　
個個馬主都要決定將馬畀邊個馬房訓練，若你單單以為貴就一定好，平就水蛋，咁就大錯特錯啦。
　　
例如今季的包尾練馬師苗禮德，在全港馬房收費方面（二十二個馬房），竟排最高第五！難怪佢啲馬不停拉倉嘞，燒鵝價錢蔗渣味道也。
　　
咁又有冇蔗渣價錢燒鵝味道呢？有！正是練出「金鎗六十」的呂健威馬房，真係抵到飛起，收費排尾二，第二十一，平到呢⋯⋯
　　
明天母親節，賽馬不是大過天，一定要讓路，否則好多丈夫會被扭耳仔！
　　
今日最矚目港澳盃，一班跑千四米，大群「老對手」又再碰頭，究竟「永遠美麗」有冇機再W？但W出賠率必冇味！
　　
我會改捧「線路之星」，因今次與「永遠美麗」再多三分差距，兼且告東尼乃「葡國仔」，勝出港澳盃有另一重特別意義！二重彩複式膽！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。