【曾智華專欄】「執笠」正確 ，復活大旺

有跟開本欄者應知，小弟上周介紹一間「執笠」但火速復活的「奇怪」茶餐廳，位置在土瓜灣靠背壟道，3月31日執笠時，名翠河餐廳。
　　
正常情況，一間兩、三千呎大舖執笠，單單清拆裝修、掉傢俬雜物、撤換廚房設備及各類喉管，將舖頭還原交業主，冇一兩個月，點掂？
　　
奇在成件事似變魔術，翠河3月31日拉閘，嘩，犀利，4月10日，即僅僅十天，已變身成荷里活冰室，「光榮復活」！
　　
此新店搞咗乜即可復活？改招牌，換冷氣喉，牆上掛上幾張海報，營造到少少懷舊西化，例如突出The Beatles等。
　　
對我嚟講，最大轉變為水吧裏面經常淒厲狂嗌的女師傅，以及三兩個充滿負能量、間中講粗口的男女侍應消失了。換來的是全新黑制服，新舊團隊踏實沉默的女侍應。
　　
整個格局立時高檔不少，化學作用就來了。因附近由天光道到佛光街，長長的靠背壟道、美善同道、高山道，全無較像樣的冰室。有的，全部是草根，甚至地踎茶記，主攻屋邨阿叔、阿嬸、的士司機。
　　
但這區近年出了不少新樓盤，大量中產人士湧入成街坊，要搵間四四正正、衛生情況合格的餐館，根本答案係——冇！
　　
終於翠河餐廳變身荷里活冰室後，即時見到效應，就是不少斯文客紛紛出現幫襯。
　　
這現象可以維持多久，難料。因打開門做生意，若似過去兩年的翠河，出現爛口大叔、粗口侍應，全部趕唔走的話，簡單，斯文客必再次「良禽擇木而棲」。
　
好嘞，如今執返正，變略略高檔，立即日夜爆滿。顯示此集團幕後決策正確，用十天由執笠變復活全面成功。但是，跑落去是大長途，維持到這個檔次嗎？