【曾智華專欄】點解寧願執笠？

香港近日突然興講執笠，不過根據小弟調查，有啲真執，有啲假執，有的「講數執」。
　　
唔方便講得太明，尤其是「假執」的，甚多盤算，總之就是幕後人決定「扮執」，這是商場的伎倆，在灰色地帶中遊走。
　　
而真執的，不少做到心灰意冷，又或睇唔到前景，計唔掂數，做生意求財，若冇財反蝕，點解唔執，難道撐下去當做善事？
　　
老友K叔的一間店則較特別，介乎真執與「講數執」之間。
　
即係點？即係以目前條件捱下去，冇得做。因在大集團商場租約滿，業主按例要求你大裝修兼加租才續約，否則唔該起身。
　　
K叔歎話：「碌Sir，其實唔係冇生意，雖然成日話啲人上晒深圳，但若出品好，價錢合理，大家在港的仍要日日食，點會冇生意吖？不過，業主企硬兼多多要求，又唔減租，咁咪玩一拍兩散囉！」
　　
K叔呻到樹葉落，因在呢行多年，都未見過如此慘況，正是租加、食材加、人工加，但最離奇，搵唔到人做！
　　
「我出到八十蚊個鐘都搵唔到樓面，連見工都冇，你話點搞？」
　　
「係呢，K叔，咪話市面執咗三千間嘅，一間十個工作人員，平均應該有三萬人力釋放出嚟搵工噃，點解冇人見工？去晒邊呀？」
　　
諗落，一係執三千間的數字根本假嘅，一係大部分員工轉行，咁轉去邊呢？難明。
　　
同K叔傾完，又撞到個經營物業管理老友大L，一開口就呻：「碌Sir，而家啲人好似唔使搵食咁，我公司長期請保安，誇張啲講，會行的，會呼吸的，三尖八角的都請，但弊在個個做唔長，兩嘢就走，個別話若散工就做，長工咪搞。」
　　
行行有本難唸的經，難怪不少人寧願放錢在銀行收息，唔做生意，香港咁行下去，會點？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。