【曾智華專欄】專業高效婚宴服務

疫情稍斂，所有一兩年前無法舉行的婚宴，簡直洶湧而至，真係飲完又飲，飲完又飲……人哋搞，我家也要搞！
　　
去年家中「肥女B」決定結婚，女孩子當然希望搞得特特別別，唔想走去中式酒樓咁冇新意。去邊呢？有靚景、戶外、綠草如茵，有點大自然感覺⋯⋯睇咗幾個場地，終選中上水馬會塊大草地，符合晒要求。
　　
為父有點猶豫，絕非價錢問題（相當合理），而是戶外搞，好大風險！可能打風落雨行雷閃電外，更怕太陽伯伯狂曬。來飲宴的賓客，不少老人家，在陽光下曬三個鐘，真係暈低都似。另外，樹多草多又怕小蚊子，兼且位置山長水遠又隔涉，冇公共交通⋯⋯
　　
不過，小弟並非主角，多講無謂。「肥女B」一口咬定——我要！為父只好萬事配合也。
　　
訂咗場地後，更標冷汗。疫情一波又一波爆發，連本來畀新郎新娘休息的度假屋也全封⋯⋯究竟搞唔搞得成？幸而放吓鬆啲，放吓鬆啲，就在上周末，N咁多擔心下順利完成，抹去頭上一額汗。
　　
搞咁大棚婚禮，由現場布置到食物到侍應服務，安排得相當周到⋯⋯女孩子愛靚，衫都換最少兩次，又冇正式房間，點搞？
　　
一切一切，正正要感謝馬會宴會營運經理彭詩薇（Zoe）。在佢領軍下，真係事事安排得無微不至。首先，馬會員工不准收利是/貼士，但所有服務員，絕冇因此而半點怠慢，位位有禮，專業高效，兼且各司其職。
　　
例如新郎、新娘及長輩換衫時，正正有位掛Abby Chen名牌員工，專職守在門外，隨時協助；你一行開，佢就鎖門，以確保一切財物安全穩妥。
　　
宴會時，新郎、新娘忙到飛起，又有專人取食物埋面前；婚禮完成，兩位主角似歌星做完大騷，乜都散晒，成個泄氣皮球，謝下謝下咁款。但一返休息室，立時精神一振，因枱上早已準備好大批美味菜式飲品，負責人真夠細心，明知主角們根本無乜食過嘢，餓到軟晒也。
　　
全部安排，我看在眼裏，覺得這位看來僅三十出頭的Zoe，肯定大有前途。離開前佢走埋嚟握手，好開心話：「碌Sir，小學開始，媽媽日日送我返學，車上必聽《晨光第一線》，成日聽見你要求同事態度專業，真係畀你個團隊潛移默化影響㗎！可唔可以合照，畀媽咪一個驚喜呢吓？」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。