旅遊界大生意

從來做任何事要成功，必須看政治大氣候，然後順之而行，才會順風順水。
若你拗頸，要逆行？若果做生意，必定焦頭爛額。若果搞政治，也會危險重重。
這個現實，沒有絕對黑白對錯之分（因人人價值觀不同），你不需同意，但應認知！
香港大趨勢，乃要求年輕人認識國家安全的重要性，之外，是理解國情。最好能夠親身目睹內地各省各市種種發展（當然是正面的）。因若只坐在香港靠課本、上網，又或
者睇片去理解中國，效果必定不理想。故此，大趨勢肯定是一團又一團大中小學生，在特別安排下，回內地作體驗。
事實上，教育局已於早前發出通函，所有官立、津貼及直資學校都收到，名為「公民與社會發展科內地考察學校計劃及安排」。要求公民科由中四級起推行，學生須往內地考察及作專題研習，讓同學設身處地了解國情及國家的最新發展，目的就是提升年輕人國民身分認同。
效果有幾大？未知，但要了解內地，一定要做，事實個個國家都在做。
不過，小弟經營旅行社的老友一聽，即時反應是：「嘩嘩嘩，大生意呀大生意！」
點解？全港中四以上學生都要去，即有十萬計學生要去！
就簡簡單單以十萬人計，每團三十人，也要搞三千幾團！當我亂估，若一個學生全團使費為四千元，咁呢項生意就是四億元！
香港旅遊業謝咗咁耐，若果呢幾千團能滲到業界，人人有分，咁肯定唔使大家口糠糠，吊住鹽水等疫情過去！
我就係咁諗，但業內老友一盆冷水淋落嚟：「碌Sir，呢類內地團，你用普通常識諗下，都知唔會平均分配啦。就算投標，唉，若你冇內地背景與聯繫，幾時輪到你呀？咪又係由三幾個自己友集團包攬？當然，或者會整色整水，漏少少出嚟做下樣。唔信？風水佬呃你十年八年！簡單，當一團又一團出發時，你睇下邊家公司做就明晒嘞！大生意，點會唔合法地益自己友㗎？」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。