【曾智華專欄】全部馬會高層要「考牌」

跑馬跑馬，冇馬又或唔夠馬，點跑？這現象從未在香港賽馬歷史中發生過，一百數十年來只會人人爭住做馬主，因此乃身份象徵，故此用盡「一切手段」都希望先加入馬會，再申請養馬。

事實上歷屆入紙申請的數量，遠遠比批出的額度高。所以，抽「中」者（因冇乜透明度，完全唔知點「抽」）多歡喜若狂，恍似中咗六合彩，又有點「光宗耀祖」感覺，嗱嗱聲走去買隻馬返嚟威威。

呢種經驗，小弟上世紀九十年代也體會過，真的是樂趣無窮（初初）。

不過，近幾年有興趣又能孭起馬主身份（每月七、八萬元養馬費者）的會員數目，明顯有下跌趨勢。早前馬會已宣布減養馬費，馬主每年可慳近十萬元（顯示步入「非常時期」了）。

可惜，今次入紙抽馬者仍大幅下降，點搞？幾千萬元年薪的總裁應家柏，連同N位千萬元年薪的總監，今次真真正正要「考牌」喇，真係中咗一句揶揄——收咁高人工，易搞就唔使搵你啦。幸而目前仍離「冇馬可跑」日子非常遠，馬會高層應有足夠時間未雨綢繆。

我哋馬迷唔使煩，仍可以每周享受兩次賽事。

今晚跑快活谷，第九場三班千二米肯定精彩，因最少三隻可以爭冠軍，包括：「時尚風趣」（六十五分）、「撼天鐵翼」（六十八分）、「川河動駒」（七十五分）。

三匹之中，最好鬥志必為「撼天鐵翼」，轉過韋廄後，已三Q一P，不過仍未出頭，以韋達之好勝，當然用盡奶力將此駒推到巔峰。

容廄的「時尚風趣」也是深不見底，兩出同程兩W，但三歲馬會否谷盡於一時，我有保留。

「川河動駒」轉跑同程後（之前跑沙田泥地）判若兩駒，兩場Easy Win，仍留三班，可添食。

總結，繼續用「撼天鐵翼」做膽。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。