【曾智華專欄】與《惡女》驚人地相似

生活在香港，只要你「好奇」（即係夠八），肯定會樂不可支，非常有充實感。日日都會無端白事彈出過癮嘢，任何塘邊鶴，處處都有大量生張熟李願意洶湧地開「城市論壇」。

呢呢，前朝小弟如常夾疊報紙入地踎茶記，嘩，但見班的士大叔，個個興奮無比高談闊論，水花四濺，講到唔想開工咁款。

講乜？正是七十六歲何伯閃婚內地妻。此Sexy個案，即時接住「李龍基癡戀內地女」花生騷，個個有自己看法，爭住發表意見。

肥叔：「呢單嘢擺明𥄫住個阿伯啲財產啦，人哋成七十幾歲仲黐埋去，貪佢夠老咩！」

奀伯：「肥佬，又唔係咁講喎，可能冤枉人㗎，咪吓吓用陰謀論睇嘢啦。你我都七張幾，仍行得做得，兼且單身，若有啱心水嘅，點解唔可以拉埋？唔通長者就冇真愛冇魅力？拍拖結婚有乜奇？點解一嘢就懷疑人？你咪小人之心啦！」

矮爺：「我都贊成。老友，我哋呢班七十幾勾寂寞男人，若另一半已仙遊，又或仔女又雞飛狗走移晒民，咁突然有個願意噓寒問暖嘅溫柔女性出現，為乜拒人於千里？喂，人嚟㗎。班仔女淨係吼住我哋副身家，但平時影都唔見，點解要將錢留畀佢哋而唔畀愛我嘅人？成年人，一人做事一人當，就算真係畀人呃，都唔關三姑六婆八卦公事！」

小弟一邊聽一邊笑，尤其矮爺所言，令我想起在Netflix睇到的《惡女》，嘩⋯⋯內容竟然與今次呢單「何伯忘年戀」驚人地相似。

大家未睇過就快快睇，一定會令你開竅，知道睇事情，不可純用自己角度就一廂情願下結論，尤其你懂當事人的決定及感受嗎？

講到尾，一句概括——究竟關你乜事？