【曾智華專欄】父親節冇馬跑

不知是壓力太大又或是從善如流，馬會決定父親節冇得馬照跑，改在前一日（6月15日）開跑黃昏馬。好唔好？其實大部分馬迷都無所謂，只是可能打亂不少預定的約會。

馬會今季安排賽事，最多人認為怪怪的為假日編夜賽，唔知有乜邏輯？5月有兩個公眾假期，剛剛是周三，有乜理由唔跑日馬？第一，會少好多投注額。第二，搞散好多人的「做節晚飯」，實屬多餘安排。究竟下季編期大員會否重蹈覆轍呢？好快揭曉，因已步入季尾也。

明天戲碼一般，決定選第三場一班千四米拆局。唔知點解報名冷淡，只得六隻，可能馬王級唔吼，費事浪費馬匹里程。好，由最高分的講起。

一、「健康愉快」，七歲馬，實力見盡，雖長期評一百分以上，但參戰一、二級賽已經勉強，無法入位，只可在三級賽博博。今次回跑普通一班賽，面對低卡士對手，雖要孭頂磅，翻查紀錄，試過一百三十二磅勝出同程，仍要尊重。

二、「神虎龍駒」，千四米專家，上季至今五W同程，但由六十一分起步，加至一百一十一分後，即坐馬監，一、二級賽食塵，今次回跑一班，雖孭重磅，仍有機會。

三、「包裝必勝」，今季略嫌跑得太密，出賽十次，從未跑過千四米，機會較次。

四、「增有」，也是密密跑，出足十次，近兩仗似無以為繼，想W？應要等下季了。

五、「傑出漢子」，罕有的位置王，今季出十一次，全部入前五名，一W四Q三P，今次仍孭輕磅，一定要預佢。

六、「旺旺神駒」，馬有鬥心，但上次W是在特擅的黏地，且用咗好多力，難連搏兩鋪。高分的「神龍虎駒」及「健康愉快」仍可恃質佔先，做複式馬膽，拖其餘四隻，一百蚊下注。