【曾智華專欄】想請楊潤雄局長食海鮮

五個月前本欄標題係乜？你當然唔會記得，乃是小弟語重心長呼籲：「旅遊發展局快做嘢！」

個人非常緊張香港的經濟發展，希望疫後盡快恢復，故此，早在自己能力範圍內，不停搞活動，支持Hong Kong Is Back及Hello Hong Kong這個特首李家超日日出鏡Sell的口號。

去年11月某晚，我又安排大班「傳媒老是佛」到鯉魚門食海鮮，事關所有香港旅遊的介紹，必有這個地標。

可惜，久久冇去，今次十二人重臨，結果落筆打三更，非常冇癮，頗多怨言。

因為一半人選擇搭港鐵，出A出口之後，立時一片茫然，天色陰暗下，全不辨路。

非常荒謬是整條十五分鐘長路，旅遊發展部門及當區區議會，半個大型指示路標都冇安裝，試問遊客又點識行去海鮮街呢？

小弟是香港人都係唔識，遇上的幾組外地遊客更是無助，只好大家邊行變問，搞咗二十幾分鐘，身水身汗（當天氣溫攝氏二十幾度）才抵達。

之後有感而發，在本欄呼籲政府有關部門快快做嘢，安排多幾個燈箱式大型路標。

結果，兩日後收到「官式回覆」，指出其實幾條燈柱有指示（蚊螆咁細，也冇燈光），並承諾會改善。

事隔五個月，前晚再帶「傳媒老是佛」去，今次真要頂佢頭槌，竟然零改善，根本乜都冇搞過！我唔想火噴噴，只想幫手搞好香港呢個旅遊城市，咁不如自己出錢嘞。

今日公開邀請負責推動旅遊的楊潤雄局長及旅遊發展局總幹事程鼎一，搵晚齊齊搭港鐵摸黑落鯉魚門（唔准用私人車），等兩位體會一下「民間疾苦」，然後再研究點落實夏寶龍主任指示，將香港化為「最佳旅遊目的地」。