【曾智華專欄】替你訂枱冇問題，但⋯⋯

早前在本欄寫過一篇《堅決永不代人投注》，有頗多迴響，原來不少人有同樣遭遇，就是替朋友下注，一片好心幫忙，結果因小小失誤，填錯個號碼，慘情，中咗。理所當然被埋怨，最弊以為你落格，從此連朋友都冇得做，你話出心幫人搞成咁，幾戇居？一次嫌多，從此痛下決心，謝絕一切代下注的要求，以免重蹈覆轍！
　　
其實作為朋友，真的是有義務幫得就幫的，小弟出心也如是。不過，幫人也不時幫出「一肚氣」。結果也如堅拒代下注一樣，邊個要求都Say No！係乜呢？正是買演唱會飛。
　　
在電台工作時，理所當然大量唱片公司與你「好好關係」，故此，要買演唱會飛，無論幾巴閉天王巨星、幾搶手門票，都會「好容易」。
　　
於是，自然生張熟李、遠房親戚、多年冇聯絡舊同事，都會不時出現：「碌Sir，幫手撲幾張XXX演唱會飛得唔得？拜託！」
　　
起初以為Easy Job，打個電話就掂，豈料原來呢個世界乜人都有。當我代畀晒錢，門票到手，通知對方攞得時，煩惱就出現。包括：一、剛剛嗰日唔得閒，麻煩代換另一日；二、唔好意思，都係唔睇啦，你搵人要咗佢啦；三、咦，唔係幾好位喎，可否再畫過⋯⋯大佬，你估我打你工乎？以後一概咪搵我。
　　
近年因小弟四圍食，故與不少食肆關係不錯，於是又湧現另一類要求——幫我訂枱。
　　
幫人當然冇問題，不過，經歷多次「冇癮過人」經驗後，要聲明嘞：「幫你訂枱/房後，請自己跟進一切，包括寫菜及要改期！仲有，小弟並不保證必定好食，因大師傅可能休息、心情唔好、掛住跑馬⋯⋯任何不滿，請不要向我投訴啊，拜託拜託！」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。