【曾智華專欄】大迷信終被打破

迷信,信則有,不信則無!風水可能也如是!不過,上述兩項可能會隨着周圍的磁場轉變而變化,我唔識,但發現一個奇特個案。
  
三十年前由廣播道遷居到何文田,為熟悉該區搵食架步,小弟不時在土瓜灣北帝街附近遊逛,睇睇有冇人氣旺盛食店。發覺整區並沒甚麼老字號,可能屬草根舊區,消費力低,食肆主要是茶記、低檔次酒樓及打冷店等,毫無吸引力。
  
有一個鋪位,尤其吸引我長期關注,位於馬坑涌道口。點解?並非好食,而是……好邪,邪到邊個做邊個死!
  
當年不少老街坊已唱:「想人蝕死,就叫佢喺嗰處開鋪啦,做乜都瓜硬㗎!」
  
起初半信半疑。但事實勝於雄辯,呢個「邪位」,多年來乜都開過,中式酒樓、海鮮酒家、地踎茶記……每一家我都去一次,一定不會返轉頭。點解?因此鋪位恍似一山洞,除門口外,日月無光。基於做嗰個死嗰個,故租金特平,不停吸引「酒樓蛇」集資去博,但不會認真用心長做。
  
小弟親身由一九九二年開始見證,直到二○一九年,所有經營者短則幾個月,長則一兩年,一律瓜直收場,但奇在永遠一雞死一雞鳴。
  
二○一九年,社會運動再接疫情爆發,更冇人敢租呢個「邪鋪」,於是丟空近兩年。
  
正因如此,相信租金必跌到變地底泥。結果引得「楚撚記大排檔」殺入,標榜——懷舊、鑊氣、大分、惹味、抵食,由裝修到價錢皆街坊式。
  
終於奇事發生!一個三十年來邊個做邊個死的邪鋪死鋪,竟被這個集團做返生,打破長期的風水及迷信疑惑。
  
真正原因是否單單抵食好食,已足以扭轉人人做不到的死鋪命運?未必!我看,可能仍有普通人不解的玄妙在其中呢!

訂閱星島網singtao.ca電郵快訊,每天可收到最快新聞資訊: https://www.singtao.ca/subscribe/singtao.php

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

延伸閱讀

share to wechat

延伸閱讀

【阿濃專欄】猜燈謎──欲拒還迎的遊戲

【高慧然專欄】黃金屋

【曾智華專欄】曾潔兒勝過梅艷芳

都市網新聞