【曾智華專欄】事先張揚：爆大冷

經常有非馬迷、非球迷、非投注者老友問：「碌Sir，究竟跑馬及職業足球，是否嚟真的？」
　　
「真又唔係，假又唔係。有錢的地方，當然有騙子。不過，體育賽事，一定有優劣高低之分。你不可能安排一隻豬同一隻馬競賽，而希望隻豬跑出。所以，做假，都要假到『真嘅一樣』，令監管機構吹你唔脹。不過，只可久唔久假一次，若長期做假，當監管者透明，咁就死得，必定重罰，兼報執法機關刑事調查！以往曾有好多例子，做假者終搞到入赤柱踎監！」我以專家口吻答。
　　
事實，雖然小弟經常嘲笑潘頓，唔知佢跑馬「開龍」定「開蟲」。但睇記錄，佢一定係「開龍」多，才能令監管者飲「單眼佬涼茶」（明唔明？），絕少郁佢。
　　
呢呢，上周六本欄只提供一隻「北極光」，清楚指出潘頓有兩個練馬師唔敢亦唔會玩，一個為告東尼，一個為賀賢，此乃長期記錄顯示也。
　　
咁歐洲足球又是否好多假波？甚少！基於營運球會涉及龐大投資，兼且若戰績好，立即豬籠入水，包括廣告費、轉播費、分紅……尤其若能打入歐聯，更是天文數字的名利雙收，球會、教練、球員皆如是。所以，舉世最認真的球賽，正是歐聯！尤其進入八強後，更必場場打真軍，絕不會作假。
　　
但是，回到普通聯賽及「盃仔賽」（例如英聯錦標），超級大球會就久不久「忽然失靈」，畀大家搵吓錢矣。
　　
歐聯各班霸，例如德甲的拜仁、英超的曼城、法甲的巴黎聖日耳門及西甲的皇馬，全部都會每季爆一兩場石破天驚大冷，輸到無厘頭，如此，幕後知情者就可以「齊齊執金」，發大財也。
　　
上周曼城的「表演」，會唔會屬典型例子？呢隊超級班霸主場對着七次聯賽作客未逢一勝的弱旅賓福特，真係理應半臂都贏，更何況有當今「入球王」——最佳射手夏蘭特在陣？所以，馬會開盤主勝只有一點零七倍（贏硬！），客勝則是十七倍。
　　
不過，賽前曼城教練哥迪奧拿漏口風，話會收起打世界盃的球員，以免佢哋受傷。我一聽……唔……好似預先張揚「食大茶飯」噃。於是博二十元賓福特勝，結果——波神上身！
　　
今晚快活谷應是羅廄世界，睇佢擺出的陣勢，起碼𡁻兩場！我會用「越駿知己」及「順勢而飛」WP二串三。兩隻當打明星，羅富全刻意分開兩場跑，心意明顯，無謂自己撼自己也！點熱都要買！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。