【曾智華專欄】兩個有一個中的菌

昨晚講到去做腸鏡及胃鏡，之前一晚服瀉藥，結果第一包冇效，到凌晨四點食第二包才開始「萬馬奔騰」，搞到清晨六點半才可與馬桶說再見。但已差不多要到醫療中心了。
　　
瞓上手術牀前，護士循例解釋一切，並囑咐簽下「生死狀」（即係，老友，你自願㗎），喂！邊有得揀呀，當然火速簽啦。
　　
剝光豬後穿起紙褲瞓上牀，護士細心蓋氈，然後等呀等。三十分鐘後醫生到，麻醉師開工，先唧幾滴鎮靜劑入口，再在血管注射麻醉。唔使五秒，已失知覺。似乎時間冇乜過就醒返。
　　
醫生乃非常「熟手男工」，做咗幾十年，半小時內乜都搞掂：「休息後到應診室見我啦！」
　　
效率之高，再次覺得，慳其他使費，都應在需要時搵私家，太大分別了。
　　
穿回衣服，歎咗杯免費熱朱古力，體力恢復多少，再去見醫生。原來短短半小時，一切已經準備妥當，包括手術後詳細報告、八張相片、一隻手術過程電腦碟……真犀利！
　　
「曾先生，你冇瘜肉（十年前有四粒，十年後竟然冇，都幾奇！）。不過，胃鏡顯示，有幽門螺旋菌，要食一個Course藥，包括抗生素，然後再返嚟覆診啦。走得㗎喇，下次見！」
　　
返屋企，速速上醫療網，查查乜嘢係幽門螺旋菌，究竟點嚟嘅，染上又會有乜後果？
　　
唔睇猶自可，一睇大發現！原來根據中文大學醫學院研究，全球有四十幾億人感染咗呢隻菌，而香港每兩個人就有一個中，比率超過一半！哈，點解冇人湧去求醫呢？因為……大部分冇感覺、冇徵狀，根本唔知！
　　
咁幾時會知？第一，好似我咁走去做胃鏡，咪發現囉。第二，感覺胃脹、胃氣多、突然消瘦、胃痛或食欲不振，到時搵醫生驗，即知。若長期唔理，會誘發慢性胃炎，導致胃潰瘍及出血。再拖呀拖，就有機會變成胃潰瘍或胃癌。
　　
呢隻菌點染返嚟的呢？通處都係，防不勝防！結論，快啲醫，成功治瘉者翻發機會好低。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。