蔡楓華澄清從未被封殺 爆「剎那光輝」後拒向張國榮道歉 翁靜晶豪氣課金蔡楓華再戰紅館：我出200萬
蔡楓華在80年代是極具代表性的藝人，歌唱比賽入行後，憑自己親自作曲並演唱的〈倩影〉紅遍大江南北，在頒獎禮上囊括不少獎項，當時身兼歌、影、視、播四棲藝人的身份，將事業推上巔峰。可惜在1985年，蔡楓華於《勁歌金曲》直播時，因對張國榮發表評論並說了一句：「一時嘅光輝，未必係永恆嘅」，導致其形象與演藝事業受到沉重打擊，隨後淡出主持群並淡出主流樂壇。
蔡楓華強調從來未被任何機構或者節目封殺過
近日蔡楓華接受好友翁靜晶的YouTube節目《危險人物2.0》的訪問，對於多年來娛樂圈經歷的人情冷暖，蔡楓華在節目中為自己平反，談到因一句「剎那光輝唔代表永恆」被指針對張國榮而遭封殺的傳言，他強調：「對唔住，冇件咁樣嘅事，我再澄清多次，我已經澄清咗好多次，不過都要再澄清，我從來未被任何機構或者節目封殺過，TVB，真係冇！」他還說：「嗰陣講呢句說話之後，監製要求我講一句話，話我講完之後就可以坐返落去。」但最終蔡楓華不肯屈服。
蔡楓華曾被《勁歌》監製要求道歉
蔡楓華在1985年主持《勁歌金曲》季選因突然爆出一句「剎那光輝未必代表永恆」的「個人感受」寸張國榮，結果由事業高峯跌落谷底，事業亦走進低潮。多年來蔡楓華不時為事件解畫，他曾稱當時張國榮在節目中演唱得獎歌曲外，還額外唱了蔡楓華的〈愛不是遊戲〉，蔡楓華有感而發說出：「其實一位歌手得獎與否，冇乜所謂，我自己嗰首〈愛不是遊戲〉冇獎唔緊要，我好希望做歌手，無謂係人哋嘅歌，抑或自己嘅歌，都一樣咁欣賞，我好誠心恭喜張國榮得到3首入選歌，但係一時的光輝未必是永恆。」蔡楓華指當時其實仲有一句說話未講，卻被急於打圓場的盧敏儀阻攔而未能說出：「我本來想話希望張國榮永遠保有呢個永恆嘅光輝。」今次在節目上，蔡楓華說：「監製叫我向某一個歌星講對唔住，但係我覺得我自己冇妒忌人，亦都冇針對人。你睇返啲片，有晒證據，我係話一個人一時嘅光輝未必係永恆，我仲有嘢講，盧敏儀接咗我。仲有一樣嘢我可以澄清，當時我同盧敏儀都係睇緊一個衛星轉播過嚟嘅，冇人知嘅，而嗰10首得獎歌曲，一早我就知晒個結果，因為喺晒我袋裏面，主持人一早知道晒，盧敏儀拉伕上嚟，本來係俞琤，佢係拉伕上嚟，但係佢唔知。同埋好多電視上面嘅操作，有時得獎唔得獎，呢啲嘢我唔想講到咁白。」翁靜晶續說：「我講！內定嘅！睇你乖唔乖，老實講所有大機構都係，電影你就要同導演上床先有女主角做，呢個係潛規則，然後你如果要去大機構入面攞獎，唱片公司要捧你，你要賄賂……」蔡楓華則坦言：「我嗰個問題係因為我係主持人，又係歌星，如果要喺嗰10首歌要篩，死就死我先。因為我係打工嗰個，我係TVB人，cut就一定cut我先。其實我一早知道cut咗，我係唔會有任何反應，所以盧敏儀講得好啱，蔡楓華嗰晚好順暢，冇飲醉酒、冇情緒問題，完全冇。」蔡楓華坦承當年已算好彩，因為本身是合約藝員，高層疼錫，加上自己都清醒，所以自行請辭：「其實我一早都想唔做，因為個角色係矛盾，又係歌星又係主持人。」
蔡楓華亦否認因此而變得「兜踎」
蔡楓華亦否認因此而變得「兜踎」：「絕對唔係，1986年係我最高收入嘅，我話畀你聽，又有演唱會又有電影，唱片公司有加人工，嗰年係豐收年！令到我嘅事業真正低潮，係我嘅唱片公司唔肯應承張耀榮，出多一隻碟去配合5場嘅紅館演唱會，我簽咗，訂都收埋，淨係訂都20萬，嗰時好多㗎喇！5場，同陳柳泉（陳淑芬老公），我哋三個一齊開會，一個CBS總經理、一個佢（陳柳泉）、一個我，佢就話張生希望出一隻唱片support住我五場演唱會，1988年嘅期就攞晒，紅館嚟㗎！但係CBS Sony唔肯出，我就同佢講，你怕蝕啫，唔緊要，我出錢，我自資，蝕咗就我嘅，但係都唔肯。咁我就有退意，想轉唱片公司，但係唔得。」蔡楓華續指當時有另一間公司出價：「我覺得人哋間公司唔會捧我，因為佢有一個歌星係股東嚟嘅，大家都識㗎啦，阿倫（譚詠麟）呀！」本來他正取捨接受耀榮還是藝能的Offer，結果聽了《勁歌金曲》監製建議：「佢講咗一句說話，邊面畀得錢多咪去邊面囉，我諗吓，先食咗呢邊先，但係呢個係咪聰明反被聰明誤，我唔知，但係我就應承咗呢邊（耀榮）。」結果1988年五場紅館檔期，要抽走蔡楓華名字，變成其他歌手的雜錦Show：「好多人唔明點解蔡楓華成日都要喺荃灣大會堂，呢個問題你要問政府！政府唔畀，文化中心唔畀，呢度又唔畀、嗰度又唔畀，逼於無奈我一定要揀嗰啲場地。」
翁靜晶豪氣出100萬支持蔡楓華開紅館演唱會
蔡楓華在2012年終於開了一場紅館四面台演唱會：「先試一試水溫得唔得先，再諗住再上，點知啲人又話唱到邊度唱到邊度，因為嗰時我五行欠呢啲（錢），唔唱唔得，人生嘅命運就係咁，你越係想做好嗰件事，有啲人不求有功只求無過，本來你唔淨止可以開一場，你爆晒㗎喇嗰場其實，嗰場紅館爆晒，係冇贊助，都爆晒！但係佢哋唔肯開，因為唔係張生唔肯，係佢哋做嘢嗰個唔想開，反正都交代到，算啦一場過。我仲要搵食，要唱其他，咪唔高興囉，我咪一路咁做，後來我又攞到期喎，又攞到紅館期，我又同張生講，諗住做，點知張生就走咗。」於是他四處登台做騷跑數，說：「嗰時我知自己最薄嘅就係財力，所以我唔理咁多，拉低個頭係咁做係咁做，到而家都唱咗50場個人演唱會。」蔡楓華自爆曾找連炎輝所屬的保險公司贊助，可是不成事，翁靜晶追問開紅館演唱會的價錢，蔡楓華坦言最近問過價，紅館開約400萬資金，翁靜晶一聽便豪氣地說：「我出100吖！我鍾意呀，我係一個好慳好窮又冇錢嘅人，但係我好願意出呢100萬，好唔好呀？最多出到200萬啦，好辛苦㗎喇。有心去做點解唔做？錢啫，唔係好大問題，好冇呀？如果要做，佢哋一定夾到出嚟，做乜要聽人制肘？400萬就400萬 ，而家社會唔同，啲人買架車都幾百萬。」至於今後工作，蔡楓華坦言仍有很事未做：「我仲有好多心願未做，但係我而家最擔心嘅係我嘅健康，我嘅年紀，因為時間過咗冇得返轉頭，好似做廣東省巡迴，正正式式的廣東話巡迴，仲有Atlantic City，即係是大西洋城 以前我經常去，去埋拉斯維加斯，美國好多地方去過晒。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
