誰「偷走了」銀債利息｜曾智華

中年香港人應該記得，2001年，前財政司司長梁錦松上任時，做了兩件事，令人非常難忘，一為在香港大學90周年時穿中山裝公開高歌「獅子山下」；另一為介紹一本經典寓言書《是誰偷走了我的乳酪》（Who Moved My Cheese)。

以上兩件事，其實與今日主題無關，只因有某著名金融高人要求我公開一條問題，用到「偷去」這個形容詞，頓時小弟個腦立即彈出梁錦松及《誰偷去走了我的乳酪》。

高人想借我個口問乜？其實，佢已長期積在心中。今年，因申請銀債長者人數及銀碼創新高，終再按奈不住，必須爆發。

「碌Sir，我要問，『是誰偷走了銀債利息』？至此，從未有人交代過，恍似一筆幾千萬的數，側側膊趁認購者唔覺唔覺就算數！」

高人指出的，其實應該所有會計界及金融界人士皆好奇，但就是不明點解銀債發行咗11年，仍從冇人問。

凍資收幾千萬利息去咗邊？

問乜？正是認購銀債的資金，由凍結一日開始，到公布認購及配發結果日，收到的幾千萬利息，去咗邊？邊個收咗？究竟實數幾多？為乜從來冇一個透明的交代？

高人指，今次申請破晒紀錄，達476,703份，認購總額1,193億元。以9月4日開始凍結呢1,193億元到9月11日計，即共有7日，各位銀行界朋友，呢7日究竟可收幾多利息？

高人肯定，幾千萬冇走雞。若如是，呢幾千萬，本應屬申請的長者錢，去咗邊個口袋？有關方面，是否應該公布呢？點解11年來，從冇一個答案？高人進一步指出，以今時今日的科技及金融先進運作，根本毋須鎖住筆錢7日，完全唔合理，也欠缺現代效率。作為業內高人，佢話，其實一日已應該搞掂，可以將債券過戶，扣住巨額金錢咁多日，絕對冇必要。

嗱嗱，今日小弟大大聲公開提問咗嘞，若冇人俾答案，唔好怨我咬住唔放呀！

資深傳媒人 曾智華