「傻姑」陳安瑩移居內地變清秀狀態勝從前 擁超強背景甘做綠葉 與男友拍拖逾40年拒結婚
65歲的陳安瑩近年在香港的演出不多，對上一次演出是去年參與ViuTV劇集《麻甩媽咪》，近來已久未見她的蹤影。直到日前陳安瑩再度現身，原來她已移居內地生活，除非有合適劇本，否則閒時飲茶、打波、去旅行，把大部分時間留給自己，久未現身的陳安瑩仍擁有一張「娃娃臉」，身形消瘦了不少，狀態似乎比之前更好。
陳安瑩憑經典角色「傻姑」深入民心
陳安瑩從小已經在片場打滾，長大後加入TVB工作，憑經典角色「傻姑」深入民心，從可愛少女與劉德華、張國榮、梁朝偉合作，到中年常接演媽媽、清潔阿嬸、工人等角色，多年來演閒角、醜角為主，粗略估計曾演出逾百部劇集，不過在2012年與TVB結束長達33年的賓主關係，以自由身活躍於影視及配音界。
陳安瑩嫌困身拒參與直播帶貨
面對近年不少香港藝人紛紛北上直播帶貨的熱潮，陳安瑩堅拒參與並表明直播工作太過「困身」，皆因自己天生熱愛自由，加上過往曾有創業做生意的失敗經驗，讓她深明「力不到不為財」的道理，現階段最愛還是拍劇，只要有合適且有意義的劇本，隨時都樂意返港過戲癮，珍惜現有的配音工作與生活自由。問TVB有否找她回巢拍劇，陳安瑩笑說：「我冇聽聞有喎，我喺出面都有拍吓電影，拍吓劇，呢個可能係以前儲落嚟嘅。」本身是配音界中堅份子的陳安瑩，當年就讀訓練班時已經主動入配音組，第一句配音的對白是《大力水手》剩係沙甸魚嚟咋！，訓練班畢業後主力做幕前，但因口齒伶俐，盧國雄羅致她加入電影配音，在90年代陳安瑩曾配音的角色包括：《赤裸羔羊》邱淑貞、《流星蝴蝶劍》、《臥虎藏龍》的楊紫瓊，《寵物小精靈》小智、《軍曹》冬樹與及《多啦A夢》電影系列的大雄媽媽，面對AI技術近年對配音界的衝擊，陳安瑩表現得相當豁達，堅信AI始終無法取代真人配音中的細膩情感。
陳安瑩演技曾獲得金庸高度讚賞
面對演藝圈的高低起伏，陳安瑩同樣擁有一套「阿Q精神」，從不介意是否做女主角，深信只要與時並進、熟記對白，做甘草同樣能發光發亮，「我喺3、40歲嗰陣，已經諗住向甘草進軍，你所謂做一個甘草，唔代表你嘅思想唔郁，你要與時並進，而家嘅潮流興乜嘢係要知，唔可以因為做甘草就覺得自己好老，你仲可以喺個圈做甘草嘅話，首先你一定要記得對白。」事實上陳安瑩雖然在TVB主要演綠葉角色，但其代表作《射鵰英雄傳》系列、《神鵰俠侶》中飾演「傻姑」及《天龍八部》中的「天山童姥」，堪稱是金庸御用女配角，其演技曾獲得金庸高度讚賞。陳安瑩在33歲演藝事業出現轉變：「嗰陣港台有個節目搵我做未婚媽媽，但係最致命嘅一樣嘢係有一套劇，廖啟智（智叔）做我老公，羅蘭做我奶奶，但係楊怡做我個女，我睇到個畫面真係唔得，如果要整師奶頭，又好似細路女扮大人，拉直頭髮同個女差唔多，我真係過唔到自己。」陳安瑩續說：「我已經唔係咁高大，唯一辦法就係食肥自己，如果食肥咗，而我嘅身體健康係唔得嘅話，我就一定唔會，但係我食好開心，我又健康，所以喺40幾歲後，我就開始真係要食肥，做啲阿媽或者阿姐嘅角色，戲對我嚟講，唔通阿媽嘅戲唔係戲？」
陳安瑩卻從未想過靠關係上位
童星出身的陳安瑩從小就在片場打滾，不單是粵劇名伶鄧碧雲的契姨甥女，更是已故著名演員關德興的契女。即使有被認為「猛料」的背景，但她曾坦言小時候反而刻意隱瞞與鄧碧雲、關德興的關係，直言不願「叨人哋嘅光」，足見她腳踏實地、全憑自身實力在演藝圈默默耕耘。
她曾以「丁艷」作藝名成為粵劇童星，與關德興夫婦合演過多部《黃飛鴻》系列電影，入行初期便已與劉德華、張國榮、梁朝偉等巨星合作，雖然擁有強勁的人際網絡，但陳安瑩卻從未想過靠關係上位：「我從來都唔覺得係優勢，細個嗰陣反而唔想畀人知，唔係咁想叨人哋嘅光，喺我立場，我冇介意過演乜嘢角色，我覺得我係對工作盡責嘅人，我冇野心，如果我有野心，我就唔係而家嘅我，如果你嗰1%發揮到光芒，就已經蓋過嗰99%。」
陳安瑩與男友拍拖逾40年
陳安瑩本身有一個拍拖超過40年的男友，二人一直沒有結婚念頭：「以前阿媽話黃大仙叫我30歲前唔好結婚，過咗30歲結乜鬼婚，結唔結冇所謂，唔覺得要畀咩嘢名份，活得開心先重要，而且我從冇想過生孩子，所以冇壓力。我成日同男朋友講，唔同我一齊，鍾意咗第2個都冇所謂。有人煲湯、照顧佢，點解唔愛屋及烏？如果要緣盡於此咪由佢，但係如果佢想同我一齊，偶然去風花雪月，我又會覺得你一生人本身鍾意圓形，偶然鍾意吓三角形都可以呱。喺而家呢個世界，好嘢都唔可以睇得太長。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
