一家8口食$2000慶生飯 阿哥「帶妻兒工人」要求除兩份 阿妹無奈求問：合理嗎？ 網民化身精算師教分錢｜Juicy叮
一家 8 口早前外出享用約 $2000 的生日飯為父親慶祝，豈料帶同妻子、兩小朋友、工人共 5 人出席的哥哥，找數後卻要求與阿妹「除兩份」平分帳單。阿妹在百思不得其解下，無奈上網求教網民：「大家覺得咁樣合理嗎？」大批熱心的網民隨即化身「精算師」列公式計數，為阿妹抱不平。詳情見下圖及下文：
一家8口食$2000慶生飯 阿哥「帶妻兒工人」要求除兩份 阿妹無奈求問：合理嗎？ 網民化身精算師教分錢逐張睇↓↓↓↓
樓主：兩小朋友約5-6歲
樓主昨天（12日）在社交平台Threads發帖，分享這宗家庭聚餐的尷尬經歷：「想問下大家，我同屋企人一齊出街食飯慶祝爸爸生日，我哥哥嫂嫂有兩小朋友（5-6歲） 計埋工人，總共有5個人，我計埋父母3個人，咁食完嘢埋單就大約$2000，我阿哥找完數之後同我講張單要除2份，即係大約每人$1000，大家覺得咁樣合理嗎」。
網民怒斥：哥哥發錢寒
不少網民均站在樓主這邊，並為她抱不平，留言痛批懷疑搵阿妹笨的哥哥自私、佔便宜：「你哥發錢寒得好緊要！」、「做大佬兩千都唔捨得畀唔好一家人出去食飯啦😅」、「雖然但是… 你哋總共8個人，一人一半即每人負責4人，所以你除咗負責你自己同父母嘅費用，連佢工人姐姐嗰份都要畀埋😓」。
網民：細路仔計半份
有網民認真幫樓主計數，指出合理的分配方法應該是父母不計，其餘大人按人頭，甚至小孩計半份：「大人計一份，細路仔計半份」、「小朋友同父母唔計，除4份（阿哥阿嫂工人同你），但你阿哥要畀3份錢，你畀1份錢（$500），工人係你阿哥屋企請／用，點解要你負責埋佢膳食？你阿嫂更加唔使講。」
也有人指不帶工人的話，一人一半還勉強說得過去：「唔帶工人嘅話除2都合理啲。帶埋至少除3/4。利申我哋生3個出去食飯都可以唔帶姐姐。同朋友食計人頭，同輩親戚計家庭，長輩睇佢哋想點，要我哋夾就夾，唔使就算。」
亦有不少網民分享了類似的家庭無奈，有網民大嘆自己家中有著「一模一樣」的情況，不過角色對調，每次家庭聚會都是由丈夫全單包辦，叔仔從不主動夾錢，但她直言：
「一模一樣～但我先生就從來無同叔仔講要錢，話佢一個人唔使分得咁清，而叔仔都從來沒諗過要夾返一份，每次家庭聚會，都係我哋找數，我覺得唔應該平分，但起碼都夾份自己同父母嗰份，兄弟感情好嘅，多有多畀，少有少畀，都會明傾，如果要計到小朋友食幾多咁就不如以後都分開自己同父母食算喇～」。
網民化身「精算師」：大爆多個拆數方案
網民還化身「精算師」，為樓主列出各種最公平的拆數公式：
方案一：扣除父母，細路計半份（除5份）
有網民建議，扣除父母兩位免費，兩個小朋友當一個大人，加上哥哥、嫂嫂、工人及樓主，全單應除 5 份，樓主只需給 1份錢（即 $400）：「減去父母2個，除人頭數，豪畀小朋友2位當一位 = 除5個，你只佔一份！」
方案二：扣除父母，細路當一人（除7份）
網民指，如果父母那兩份由兩兄妹一人請一份，其餘按人頭計，兩個小朋友當一個大人：「絕對唔合理啦，應該除 7人份 （2個細路當1人）。跟住爸媽個2人份就你同阿哥1人請1份，即係你畀2人份，佢畀5人份。」
也有網民更精確精算：「要計就均真啲，諗埋啲縮數，唔計你父母，叫佢畀2000/6*5🙄」、「total（總共）應該計7人份（2個細路當1個大人），你哥畀5/7，你畀2/7，父母佢都有分，所以一人 share（分擔）一分。」
方案三：除 3 份（分開家庭）
另有網民認為，如果真的要計，也應該以家庭單位來計算：「就算要分，都係佢一家5口加埋老豆老母嗰份，你同佢一人一半，即係佢 total 畀6個人錢，你畀兩個，再計清啲都係分3份。」也有網民指：「若你哥沒有帶家人就除2，若哥嫂加工人，應除4，小朋友可以不計在內。」
網民：作為阿哥不如請埋
也有網民指出，作為長兄，在這種小數目的家庭聚餐上根本不應計較。有網民猜測是否哥哥最近經濟出現問題，才會如此：「正常係阿哥畀晒，一嚟睇住阿妹個荷包，二嚟佢自己都帶多咗幾個人都仲要同你對分就唔係好識做，阿哥係咪最近手頭緊呀？男人通常個排唔係好掂，至會計埋啲婆乸數」。
亦有網民直言，按人頭計先$250（2000元／8人）一個，「當父母係除2，先收你兩舊幾水，作為阿哥，不如請埋」、「阿哥，有大食大，咁簡單道理都唔明。」認為這種外人看來有些計較的態度，容易影響手足感情：「呢啲大佬太小器，以後父母不在，你們也唔會聯絡。」
不少網民勸樓主下一次要醒目，避免這種有些尷尬的飯局，大可以分開慶祝：「如果講到錢唔舒服嘅話！下一年要醒目，唔好同阿哥屋企人食，你自己借啲意唔得閒，第二日自己同爸慶祝咁可能開心好多」、「我一個請晒父母好過請佢老婆、工人食」。
也有人幽默獻計：「下次你帶多4個人，打和」、「下次帶埋男朋友去，咁樣分兩份，條氣就順啲」。也有人覺得家人之間不需太計較：「我自己覺得唔使計得咁足，除2 ok。」
資料來源：0120_uiy＠Threads
相關閱讀：
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
