【張無忌專欄】唱好安全帶

安全帶新例實施以來，市民怨聲載道，有口皆「悲」，訴說座位淺窄難讓路，想落車要先解安全帶，行出去㩒鐘，然後又返回座位扣回安全帶。車一停站，要火速解開安全帶，然後撲出去落車。如果手腳慢，就要坐多一個站，再重複做多一次扣、解、扣解、飛身撲落車，運動量大過做GYM。

民調結果顯示，市民對這條忽然實施的新例，大多數給予負面評價，無忌則認為，做人應該樂觀D，盡量發掘新例的正面價值，齊心合力，唱好新例，唱好安全帶！尤其是窮人，今後「逼巴士」乃是富貴象徵。

在以前，搭的士使人羨慕，現在搭巴士乃顯示隨身袋備五千元，如果一天搭四次，若咁好彩被檢控四次，一天豪花兩萬元，試問有甚麼短程交通工具，能顯得自己腰纏兩萬車費之豪？

此外，巴士司機也獲益良多，須知他們由開工至收工，都屈在狹窄的座位，手腳抽筋事少，多了一個大肚腩出來才最要命，新例實施可免此憂，須知他們有責任協助乘客扣好安全帶，一架巴士，百幾乘客，三兩個乘客須協助，他們便要撲前撲後，撲上撲落，莫講話冇肚腩，佢地想肥都幾難，巴士司機唔使做GYM都可以身材苗條，肥媽都可能轉行，唔做電視藝員，跑去做巴士司機，亦未可料。

得益最大者，肯定是鄧兆尊，他的三位紅顏知己都去揸巴士，就能KEEP住魔鬼身材，月薪約六萬，真是財色兼收，鄧兆尊樂得清閒，也毋須陪她們行街睇戲又「濕平」，回復自由之身。

安全帶好處多多，應該推廣再立例，那些推住木頭車收紙皮箱的阿婆，也要配上安全帶，阿婆都能「由窮及富」了。