【曾智華專欄】調查結果肯定唔準

警方公布首季騙案數字，錄得8886宗（咁鬼好意頭㗎），按年飆升六成半。驟眼睇落，嘩，好似好勁喎。不過，只要你向身邊任何人問問，都知今時今日騙案早早「水銀瀉地」，點可能一季只得八千幾宗呀？八萬幾都已經講少咗！因為大量市民中招或冇中招，基於不同原因，連報案都費事。
　　
點解咁多人行騙？騙徒十之七八乃「經濟學專家」，完全明白付出及風險與收入不成正比，甚為著數也。
　　
執法者老友拉過不少騙徒，部分非常坦白：「阿Sir，又唔使偷，又唔使搶，毋須用暴力，只需坐在冷氣房，用Handsfree不停打電話已經掂，好似釣魚啫，有耐性，肯定有水魚上釣。N咁多騙案， N咁多人受騙，斷正機會根本唔大，加上刑罰唔算重，非常博得過㗎！」
　　
某政黨基於騙案火箭式上升，於是在網上及街頭做訪問，睇睇騙案最新走勢。
　　
調查訪問咗六百幾人（ 喂， 少唔少啲呀？），結果發覺七成受訪者每周收到三至五個疑似騙徒訊息（吓？每周三至五個？咁我與大群老友肯定屬於不普通的人嘞，因我哋個個每日最少收到五至七個幾乎肯定係行騙電話訊息！
　　
另外，政黨調查又顯示，一成香港人曾墮入不同的騙局陷阱。（哈哈哈，一成？倒轉就會！香港人一生之中從未畀人呃過的，肯定不足一成！）
　　
小弟認為某政黨調查結果得啖笑，完全唔準。事實，單單個人認識的朋友，由普通小市民打工仔到明星、大狀、醫生、CEO、富豪、高官、議員⋯⋯以至執法者（珍珠冇咁真）皆九成曾中招。
　　
不過，呃騙你，並不一定犯法㗎。例如朋友作個悲慘故事呃你借錢，然後扮失憶唔還啦。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。