【曾智華專欄】退休組合公用股做躉

散戶，是一種好怪的動物，注定在投資界變水魚，因為——無知、貪心、懶惰、冇主見、耳仔軟。升市時驚太高，跌市時驚未見底。擁有以上心態而希望在大鱷如麻、騙子如毛的金融江湖謀利發達，簡直黐黐哋。
　　
近年小弟突然多咗個「投資專家」形象，搞到無論在哪裏，都會有人「求籤問股」。
　　
其實我知鬼咁多咩！香港有幾千家上市公司，龍蛇混雜，大部分皆蝕本（可能大股東自己賺），故此，研究根本嘥時間。
　　
一直以來，在任何退休投資分享講座，個人必再三向與會者強調：「各位，一、唔好發夢炒股票會發達，反之，蝕到攤攤腰周街係；二、唔好以為炒股可以代替工作，甚或達致安享晚年，冇啲咁事；三、退休投資組合，一定要有幾隻公用股做柱躉，雷劈都唔驚執笠，因政府唔畀得佢哋死，甚或蝕本；四、買股票，只買恒指成分股內歷史最悠久的本地（絕非內地）殷實大集團！」
　　
小弟的鐵律，當然有好多「叻仔炒家」嗤之以鼻，正常，各家師各法也。但若想安安穩穩日日瞓得着的退休者，跟我做法，絕對可保內心安寧，更不會變水魚，被大鱷吞噬。
　　
呢呢，事實又擺在眼前啦。上周四大假前，恒指跌到一仆一碌，曾插500點，最終都跌369點。
　　
「當炒股」騰訊跌10元。但幾隻公用股呢？煤氣跌2仙，中電跌5仙，港鐵跌2毫半，真係完全冇乜點郁噃。
　　
其實股市跌，正常過正常。因內地消費力弱，還有幾多同胞能來港掃股？此外，普通邏輯，息升當然樓跌股跌。
　　
你問我點面對？擺定現金好耐喇，終等到隻目標股票到入貨位，即港交所跌破300元，愈跌愈吸呀！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。