【曾智華專欄】一膽拖三腳

喂喂，各位，今日小弟標題並非講賽馬！講乜？乃係講退休財務安排呀！
　　
理財專家老友羅國森定期出版書籍，目的並非賺錢（賺鬼咩，大家出過書的都知，唔蝕已偷笑），而在完成終生志願——協助退休者認識理財重要性，早早部署，以能安享晚年。
　　
小弟仲有半年「奔七」，絕對理解晚年要安然度過，真是無財不行。但「財」不會樹上生出來，也不會天掉下來，更不會似班「龐氏騙局佬」、「微信女」及網上財務騙棍咁，猛咁呃鬼食豆腐，話跟佢哋買就——好易中，好易買餐餸！
　　
一切必須萬丈高樓由地起，分兩個階段去博回來。第一個階段，二十五歲到四十歲，狂做，希望得到同事尊重、上司賞識，升職加薪。
　　
然後儲得第一桶金，四十歲開始供樓及學習理財。過程當然要交「學費」，不過，此乃必經之路。只要唔好成個儍B散戶咁——貪心、懶惰、無知，自然在投資路上會跑贏大部分人，慢慢達到財務自由。
　　
好嘞，到六十歲嘞，理論上生理機能開始退化，體能所限，想博都冇得博，就要開始盤算如何安然行到人生終點。
　　
羅國森假設你有一層自住樓（一千萬元），另加一千萬元流動資產，咁就可以玩「一膽拖三腳」，舒舒服服無憂無慮行到尾。
　　
方法是：一、買五百萬元政府年金（每月收約二萬七千元，直至離世）；二、買四百萬元領展及中電（每年收四至五息厘，每月有萬六，仍保本）；三、買一百萬元銀髮債券，每月有三千幾元利息；四、逆按揭居所，每月收二萬五千元，直至離世！
　　
今日主題「一膽拖三腳」，明天賽事我提供的也如是，專攻1000米直路賽，全買華人仔，以「加州得力」拖「怡心聲」、「萬里至飛」及「嘉應精神」！