【曾智华专栏】支持“马拉松聂”

朋友之间，一定要你支持我，我支持你，才会关系长存。支持乜呢？正是当你做好事时，要帮手，开到声，一定要帮，例如搞慈善活动或个人筹款。
　　
前公务员事务局局长聂德权（哈，话佢系朋友，究竟有冇高攀呢？），去年六月卸任后，变咗“快乐聂”，大解放。首先周游列国，就算疫情未过，照样四围飞，然后将风骚相片放上社交平台，羡慕死人。
　　
佢周身精力，虽然因为在过冷河，未可正式公布下一份高职，但你我都会估到，必有N咁多人揾佢出山。其中之一为去年十月底承诺做“香港新方向”荣誉顾问（相信只需斋噏，唔使落手）。
　　
好嘞，其他澎湃精力又点发泄？就系日日跑马拉松，真系日又跑，夜又跑（社交平台见佢周不时夜跑）。
　　
跑跑吓，不但上晒瘾，兼且今年正正式式参加渣打马拉松，来一次“处男全马”（哗，够唔够力㗎，喂？），为作标志，决定打正旗号为香港防癌会筹款，希望为癌症病人改善生活做出点点贡献。
　　
如今任何人，只要老友够多，真系“筹款容乜易”？因毋须四围打电话或亲身劝捐，只需在所有手机上的老友群组发个呼吁，诚心诚意话——盼望得到你的支持，共襄善举，然后加几个感谢Emoji即掂。
　　
如此，若你有人缘（当然，在位的当权者亦会大把人畀面，不过阿聂已卸任），肯定善款如雪片飞来。
　　
聂德权为官数十年，离开政府前，一直是民望最高的局长（唔使之一嘞），点解？因攞个心出嚟做嘢兼冇摆官威，尊重别人感受。
　　
小弟收到佢呼吁，二话不说上网捐款。咦，前面只有一千大元，可能我系第二个噃！且看“马拉松聂”今次“处男全马”筹到几多先。