【曾智華專欄】未復常，唔飛！

新年團拜，見到任何人皆必問：「喂，碌Sir，幾時再飛呀？你成隻馬咁，被逼勒住3年，必定成口血，準備衝閘啦吓嘛？」
　　
「唔係喎，仲未打算飛喎，等真正復常先啦！」旅行不是走難，不是想捱程序，不是想折騰，更不是想逼餐飽。如今出發去旅行，尤其回內地，根本搵嚟煩，咪搞我。
　　
我當然想去日本浸溫泉，去台灣環島狂食，去泰國曬太陽，去潮州歎劏咗仍彈吓彈吓的牛肉啦。
　　
尤其回內地，見到條過關人龍就皺眉頭。去南韓也如是，要48小時內做核酸撩鼻，去到也驚領嘢，咁樣旅行法，有乜閒情逸致？
　　
最搞笑，剛剛去完英國及日本返嚟的老友紛紛反高潮：「唔使去喇，反正通街都係香港人，個個講香港話，根本唔知離開咗香港！」
　　
飛日本，班班機爆，香港人對日本嗰種熱情與深愛，真係非常得人驚，若畀先父一輩見到，肯定嬲到血往上衝，中風都似。因為佢哋嗰代一講起日本，必定咬牙切齒，差不多想立即拔刀揸槍，撲去同佢哋死過。
　
只是真係一代還一代，近代內地人及香港人，尤其年輕的，根本冇興趣再講國仇家恨。故此，雖然過去幾十年，內地猛拍狂播與日軍作戰的電視劇，但隨着日子過去，一律變「票房毒藥」，結果無法不向現實妥協，以免「倒錢落海」。不過，講真，反日電視劇套套內容都千篇一律，你唔厭，我都厭。加上任何人踏足日本，必被這個國家的風景、文化、美食、禮儀及潔淨所吸引，肯定會去完一次又一次。
　　
只要有得自由選擇，人必定崇優！這就解釋到點解近月30萬港人擁去日本，狂花近800億日圓了。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。