由撞死老婆開始

多年前開始，我對一套電影的吸引性，定下一個自身感覺的「小便指數」。然後，再入戲院靜靜觀察。簡單，若一套戲又鬆散又沉悶，自然不少觀眾會中途離場，又或頻頻去洗手間，反正任何時候回座也冇損失。
不過，若是遇上一套極度緊湊、幕幕高潮幕幕金的電影，為免錯過每一畫面、每一情節，觀眾則會自動忍忍忍，幾大唔離開戲院，因劇情發展的磁力驚人也。
小弟久未遇上如此一類電影了。誤打誤撞，上周末揸個遙控，百無聊賴亂撳，又撳出一套Netflix外判電影，第一套丹麥製作。心諗，歐洲片，一定風景靚，睇吓啦，反正若唔好睇，五分鐘可以即Cut，再Search過，冇壞。
套戲台前幕後我冇個識，名《成人級愛情》（《Loving Adults》），個中文譯名古古怪怪，唔知講乜。
在無大期望之下，哎吔吔，由第一場開始，已成個人畀佢啜住，冇得郁，然後近兩小時追落去，幾大唔「殊殊」，你話吸力幾大！
此片絕非奧斯卡級數猛片，只是小本製作，但勝在劇情發展，不停出人意表，真係未睇到尾，都估唔到咁收場。
此片來自Anna Ekberg著名小說《Till Death Do Us Part》。即係——未死都冇得分手！
編劇為女性，執導亦為女性，名Barbara Rothenborg！點解要突出兩皆「女性」？因為只有女性才寫得出女性最陰暗一面的層次，男人根本無法想像！你睇過就知！
好嘞，究竟點解一開場我就似被巨大磁石吸住？正因一場戲……
一名事業成功的建築公司老闆基信，因有外遇，被結婚二十年的老婆莉安娜用狠招相逼下，竟決定謀殺老婆！趁佢黃昏跑步時，猛力用車狠狠撞死！
豈料……原來被殺的，竟是另一慣穿同樣裝束跑步的女鄰居！本應死的，仍生勾勾！發展下去，橋段相當「燒腦」，結局更出人意表。當然不能劇透！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。