林海峰是但噏金句語錄

捍衛廣東話：你哋聽K-Pop學韓文，唔會因為我首廣東歌，而學好廣東話？30年後，嚮廣東道講廣東話，仲有冇人識聽？撐香港已成風土病，有香港成分就盲撐，就嚟香港腳都撐，香港人行香港路。

打工仔心聲：冇人鍾意起身返工，但返一份鍾意人工的工就唔介意起身。浪漫是取決於夠唔夠浪費，人不夠浪漫是因為人工不夠浪費。香港人人搭加航，全名加班航空，OT Airline，廉航來的，仲係飛一世。低層是廢青，老細是傑青，中層就是淒清。既然低層是廢柴、高層又無可取代，所以中層就是無可取代的廢柴，專負責食屎和執屎。

怪獸家長：香港家長壓力好大，尤其是小朋友考試季節，內心的菩薩都變恐怖分子拉登。萬般帶不走，唯有（作）業 隨身。家長得閒去搞嘢，小朋友多啲去郊野，教育o既嘢，大家出來求財，唔使攞人命嘛！

新飲食態度－懶係簡單：香港地道美食的共通點係，品牌有名氣，老闆有霸氣，廚房有鑊氣，招呼有脾氣，門口有人氣（長期排人龍）。遇上惡劣招待，甚至被叫「咪鏈嚟」（米芝蓮），都會令人愈叫愈要嚟，因貪佢有星，咩星？係La 星！香港除了係美食天堂，仲叫乞食天堂（受氣都要乞求去食）。

獅子山精神：常言道獅子山精神，點解香港咁多個山，獅子山寧舍精神？其實其他山都好精神，只係無Pub歌。大帽山平日唔會去，天寒地凍才會去，「條命我自己o既」！香港支旗最近有少少軟瀨瀨，可能受獅子影響，獅子又似有精神病的開始變種，變成撕裂，撕裂比獅子兇猛，把香港幾百萬人撕開一碌碌碎上。美容院係毀容院？新聞自由玩完、港產片玩完、廣東歌玩完、廣東話玩完、和諧玩完、香港玩完喇，我頂！

合家歡坐七人車：香港好多七人車通街走，但人齊坐滿就會有好多要求，同一部冷氣要調教不同的溫度，同一時間要調教不同的音樂，但一國兩制係唔存在。真正的和諧唔係七個人同一方向，係七個人唔同方向，而又互相尊重，駕駛的車才是和諧號。

其他金句：以前的手提電話好似啞鈴咁重，但拎得起放得低，現在的係拎得起放唔低。木口木面相反詞係high口high面。香港人做足反應，行又行過出街，瞓又瞓過馬路，最緊要係有無鏡頭take你，即係有冇人睇你台戲。高中女無忘初中，扮晒眼大、腰細、腳長、講話仲高八度，但有樣係真，就係乞人憎。電影《英雄本色》是香港經典電影，無得回去，但要告知大家，我哋唔見咗o既嘢要自己攞返！做香港人！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。