前港姐曾瑞珊割腸救子 罕病兒曾做8次大手術 移台生活離婚擬復出 與陳茵媺同屆選美
曾瑞珊曾在2006年與陳茵媺、周家蔚及呂慧儀同屆參選香港小姐，落選後曾在娛樂圈短暫發展，其後毅然決定轉行、回歸家庭並育有一對子女。然而，她的生活迎來了極大挑戰，因為她的大兒子甘珞龍（甘甘）一出生便被診斷患有罕見病「短腸症」，出生僅3天就因「扭腸」而必須接受緊急手術，在6歲前便經歷了高達6次大手術。多年來，甘甘都無法像一般人一樣用口進食，日常生活完全依賴靜脈輸注機輸入營養液來維持生命。
曾瑞珊割腸救子重新出發
曾瑞珊其後舉家移居台灣。2024年，曾瑞珊捐出小腸給兒子並在台灣接受「活體小腸移植」手術，她形容該手術是「打大佬」級別。在今年的中秋節，甘珞龍因為腸道出血入院「維修」（接受治療），她坦言每一次出現狀況，作為媽媽，心裡還是會擔心，幸好住院一個多星期終於可以回家：「沒有甚麼比『可以回家』更值得感恩。」曾瑞珊早前接受梁靖琪的《Tea Talk with Toby》訪問，透露自己原來已經離婚並重新出發，她坦言仍然很喜歡演戲，對演藝事業仍有期望。
梁靖琪讚曾瑞珊學懂愛自己
梁靖琪在IG貼上與曾瑞珊的訪問片段並說：「佢同我好姊妹Janet識咗20年，佢哋當年一齊選港姐，邊個會估到之後條路係咁行？2012年佢個仔仔甘珞龍（Credus）出世，第三日就發現唔肯食嘢。拖咗幾日，有個資深護士望一望，即刻話唔對路。上到兒童病房，見到張紙寫住『壞死性腸炎後遺症』，佢成個人癲咗。之後三個醫生、十幾個護士圍住張床仔，佢話個仔插滿晒喉。佢同自己講：唔可以喊，唔可以跌低。佢學識將情緒shut down，唔係唔愛，而係唔可以畀情緒帶住走。」Credus前前後後做了8個大手術：「仲未計無數細嘅。佢曾經覺得自己唔係一個媽媽，唔敢抱佢，冇餵過人奶，覺得自己冇用。但就係喺嗰個位，佢學識咗『愛自己』。唔係出街買件衫咁簡單，而係真正相信，你唔淨係『邊個嘅阿媽』，你係『你』。六年前移民台灣，離咗婚，重新出發。妹妹出世，健康快樂，仲天生好保護哥哥。呢個就係上天送畀佢嘅禮物。珊珊而家仲係好鍾意演戲，對演藝事業仲有期望。唔會再將自己收埋。不要怕，只要信。好多嘢都係因為恐懼而令你唔夠膽向前。將恐懼擺低，只要你相信，未來就會係好光嘅。」
曾瑞珊強忍悲傷陪甘甘打針
在訪問上，談到當年移居台灣的原因，曾瑞珊說：「喺嗰邊有一位非常之勁嘅醫生，專門我仔仔呢個病嘅科目啦，係比較最專門嘅。當年點解我識佢呢，就係經歷咗咁多嘢嘛，有時有啲嘢你唔係齋講畀某一個人聽你就會舒服嘅，同埋你要搵啱人講呢，其實都係一個好難嘅課題嚟嘅。而家諗返轉頭，其實我當時都幾恐怖，係冇咗呢個情感呢個嘢。但係，我都覺得我做得啱囉，因為我冇將個情感擺喺first嘅時候，我冇跌一個情緒。我有諗過不如同我仔離開算，真係好辛苦，我見到佢嘅辛苦。同埋你因為喺個醫院度，你會經歷好多啲，你想想像唔到，但係其實非常之痛苦嘅嘢，譬如我仔打針，因為可能佢由細到大打太多針，佢啲血管已經收埋晒，所以佢每次幫佢打『留置針』（插豆）呢，係每次都要插九下，插完呢度唔得，掹返出嚟，插另一隻手，插到佢手手腳腳全部瘀晒。即係你呢個moment，但你唔可以喊喎，你唔可以鬧人喎，因為，如果你只要一刻個醫生覺得你控制唔到情緒，你以後都唔使再同你個仔一齊入去嗰間房度喇。佢每次如果入去嘅時候，你就要離開喇，喺嗰個moment，我係可以陪住，或者抱住佢一齊入嗰間房，佢哋去同佢處理嘢嘅時候，因為點解？我夠冷靜。但其實我入面已經癲緊，我係控制住自己。我自己都同自己講：『好啦，我shut down啲情感，千祈唔好喊，你要做得好好，因為你，做得好好嘅話呢，啲護士覺得你夠calm呢，佢就會畀你多啲，多啲機會去融入佢哋啦。』」
曾瑞珊幼女兩歲霸氣護哥哥
曾瑞珊坦言女兒的到來，是上天的恩賜：「我個女女係非常之極之健康嘅，亦都好cheerful啦，非常感恩上天。佢天生就係有條nerve（神經）係好保護哥哥。佢以前有一個scene，我到而家，我個friend講返出嚟，我哋兩個都覺得真係好勁。我哋嗰時帶佢去遊樂場度玩啦，嗰度有一個area係玩車仔嘛，我個仔嗰時已經係七歲，差唔多七歲，其實基本上係識踩，但係佢啲肌肉啊等等嘅發展唔係正常嘅小朋友，所以佢踩唔係踩得咁好，咁就有一班外國嘅小朋友啦，佢哋細個佢好明顯，就踩得好好，係咁踩踩踩踩，咁佢就有啲阻住人哋。其實佢哋都唔算話好mean，但係就有些覺得：『Don't block the road! I want to go forward!』好大聲。我個女嗰時兩歲，仲真係行都仲係躝吓躝吓，佢淨係指住嗰幾個人：『Don't you talk to my brother!』佢到而家都係咁樣，即係如果一有人同佢哥哥講大聲啲，佢即刻個人就會上身㗎喇，佢天生就知道哥哥係特別需要，所以佢就，好似天生會照顧哥哥。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
