阮浩棕揭與何沛珈假分手真相 爆星三代闖內地被逼走辛酸丨獨家
阮浩棕近年憑實力上位，跟前度何沛珈齊被力捧，他首度澄清絕非因上位壓力而分開，面對網民質疑兩人自製假分手劇本的風波，阮浩棕親述兩人現時真實關係。另外，他又自揭「星三代」在內地捱苦，遭遇不公待遇與「賣肝」應酬的辛酸史。採訪：方騫平 攝影：朱偉彥 場地：HENRY Pub
阮浩棕在TVB新劇《死有對証》飾演具實力又囂張的港聞記者，最好玩劇中可以瘋狂鬧吳若希，更獲導演信任。他直言：「呢個劇有好大發揮，角色前後對比太大，前面大家會見到我好囂張嘅一面，後面就漸漸有啲黑化，狀態好跳。」最深刻是一場獨腳戲，發現小時候犯錯的回憶，6至7分鐘冇對白零台詞，純粹內心戲，非常難處理。他記得去到拍攝現場，導演問他：「你想點演？」這份信任令他驚喜。而韓瑪利（Mary姐）更當面為他打強心針，大讚「做親我仔女嘅都會紅！」
除《死有對証》，他在《非份之罪》的爆喊崩潰戲亦成焦點，該次Keep住喊足半小時，喊到整個人乾掉。演技獲讚，他歸功經歷：「入行到依家咁多年，見過好多唔同人同事，特別係去內地發展嗰幾年，我覺得自己進步最大、吸收得最多。冇離開公司呢3年，就唔會有𠵱家嘅我。」
「星三代」有包袱
作為「星三代」，他承認有一定有包袱：「入行嗰陣好怕俾人知我係梁舜燕（Lily姐）係我個孫，好驚自己做得唔好、表現差，人哋會去同嫲嫲講『你個孫唔好呀！』所以我剛入行嗰陣，完全唔會公開提呢個關係，一直去到2017年我約滿離開公司，唔使再揹住包袱喺社交平台交代。」
阮浩棕經歷促使成長
回憶起當年往內地發展的歲月，阮浩棕雖然有導演爸爸「罩住」、少走很多無謂應酬的彎路，但過程依然充滿殘酷血淚：「拍完首部劇後曾面臨長達半年的工作空窗期，越坐越驚；外闖期間更遭幕後團隊刻意刁難，雖然總導演搵我開工，但幕後有自己班底，為咗想逼走你就會開一啲好差嘅待遇。就算同一樣重要嘅角色，人哋可以要求自己一間房，我就唔得，要我自己出返一半房錢；甚至連演員餐都話唔提供俾我。好彩遇到好人好事，有生活製片幫手處理做Upgrade，房錢就冇辦法喇！喺外邊闖蕩，先會明白世途險惡，樹蔭有幾好。」在他爸爸保護下冇遇過潛規則，飲酒應酬文化一定有：「盛情難卻飲到『賣肝』，宿醉回程，好彩當時年輕個肝仲頂得住。」亦成為磨練，讓他急速成長，明白有工作絕非必然。
阮浩棕被斥態度囂張
講到不開心事，之前他拍《靈戲逼人》時角色比較暴躁，雖然香港反應好，但內地媒體好多人討厭該角色，甚至鬧他：「你邊位呀？我只想睇張振朗！」當時他太緊張，在社交平台回應「其實喺公司排位上我都係男主角」：「其實我只想表達男一男二都係主角，點知鬧得更大鑊。最近傳他上《女神配對計劃2》向前好友何沛珈求愛，亦被網民鬧足全日，狂轟是他自製假分手劇本：「事件係對失構成困擾，但他理解大家有討論代表有關注度。喺我立場會尊重節目組，節目𠵱家出街，求愛勇士都現晒身，我哋呢個其實已經係一個完結嘅故事，大家諗得太多，多謝大家關心，展望將來啦。」
他解釋當初退後一步做回好朋友是雙方成熟討論後的決定，絕無公司上位壓力，至今仍在追夢路上互相扶持。他自嘲性格「擔屎唔偷食」絕對是做老公的好材料而非男友，但男兒當自強，目前能力未夠組織家庭，因此先專心搞事業，日後就算拍劇情侶檔上陣也絕不尷尬！除拍劇外，做大騷主持都是他目標，希望未來幾年可以集齊公司各大 Show 嘅「印花」，向全能台柱嘅方向努力！
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
