名古屋亞運‧乒乓女雙｜杜凱琹坦言這塊獎牌壓力好大 希望外界不要單純以成績否定其他隊友的努力
港隊乒乓女雙組合杜凱琹/吳詠琳，於愛知名古屋亞運女雙四強以局數0:4不敵日本組合早田希娜/張本美和，未能晉身決賽，仍然為港隊增添一面銅牌；亦是乒乓隊今屆為止唯一的獎牌。杜凱琹賽後坦言呢塊牌壓力好大，亦好高興同小組妹吳詠琳合作有好成績。「阿杜」亦希望大家不要只睇獎牌，而否定了乒乓隊在其他項目的表現。
杜凱琹/吳詠琳於四強面對日本的早田希娜/張本美和，除首局開始時領先5:1，之後一直處於下風，最後以6:11、5:11、4:11、6:11，局數0:4落敗無緣決賽，在不設銅牌戰下奪得一面銅牌。杜凱琹坦言壓力很大：「嘩，壓力好大。雖然已經屏蔽好多外界訊息，但多多少少都會感受到。即是雖然可能整體我們可以做得更好，但最後拿到女雙銅牌都好開心，亦都希望大家唔好永遠都因為個結果去否定我們所做的一切。其實我們在亞運會出發之前，雖然每次都話力爭獎牌啦，但其實我們都知道好難打，好多天時地利人和因素。」
放下包袱打自己鍾意的乒乓球
杜凱琹續說：「我覺自己前幾段都做得唔好，特別是混雙八入四那場，是我近十年以來打得最差的一場，我們兩個都是被結果困住，或者好似呢場波唔可以輸咁樣。去到個人賽自己其實都好崩潰啦，之後用好短時間去調整，跟住去打單打、打女雙。其實女雙對韓國那場比較難打少少，一路都落後，跟住搏返來。我覺得都已經好似無東西可以輸，已經輸晒，好似在場上面反而可以好好做自己，或者打自己鍾意的乒乓波。」
杜凱琹承認今仗處下風：「今場比賽就肯定係下風波，我們剛在瑞典決賽輸給她們。當時我覺得對方對我們的準備做得好充分，特別我們前面又贏中國隊、韓國隊，對手之前對我們不太了解，今日明顯就將我們的落點、所有東西研究得好仔細，所以我們其實一上到場可能發動或者想進攻都好困難。之後去到相持階段，我們實力底蘊的確係同對手有好大差距。」
詠琳感謝「阿杜」一直支持
吳詠琳賽後表示：「其實我打團體賽時候發揮不是太理想，我都不太適應呢個場地同埋比賽用球，所以一上場其實自己都打得不順，真是很緊張，但好好彩我的隊友都一直好鼓勵我好信任我，一直給我機會再上場，之後我就慢慢去調節自己，最尾在女雙就打得越來越好。」
詠琳亦感謝拍檔杜凱琹：「我好開心可以在亞運拿到塊牌。自己第一次拿到成人錦標賽、大滿貫，甚至亞運會獎牌，所以好多謝她(阿杜)，可以給機會我跟她夾女雙，整個全職乒乓生涯裏，她教我好多東西。所以，我們會繼續努力，多謝大家支持！」
目標洛杉磯奧運 明年女雙世界盃
杜凱琹亦讚揚詠琳：「我覺得同詠琳拍檔好令我驚喜。我打波以來都是夾右手球員，即是黃鎮廷。我跟詠琳算係第一次(夾左手球員)，我自己其實都無乜信心。我覺得我們可能個基礎打得比較好，因為我們私底下關係好好，之前成日都講乒乓球，她又好知道我鍾意打那種球，我又知道她鍾意打那種球，某程度上是一些場下的默契帶到去個乒乓球上。其實我們每一站比賽都有發現好多不同問題，技術上有些不足，之後我們在心態上都有唔同程度(不足)，我覺得可以再練多些，之後我們再成熟些。因為洛杉磯又有女雙項目，新增這個項目，明年亦都有女雙世界盃，所以我們都會朝住呢個目標努力。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
