名古屋亞運｜Kaiwing成港隊LOL三朝元老 笑稱打Faker會駐中路比個驚喜佢 無悔遠走巴西聯賽
今屆亞運電競《英雄聯盟》（League of Legends，LOL）香港代表隊在資格賽中突圍闖入8強，並由三朝元老司職輔助的Kaiwing凌啟榮領軍，他在電競代表隊啟航禮後受訪指希望可以用自己的經驗，令到隊伍打出更好的表現，提到上季遠走巴西聯賽，他指回望過去並未後悔，亦吸收到當地在戰術和打法的不同。提到如何對付Faker時，Kaiwing笑稱會駐中路比個surprise佢。
Kaiwing成港隊亞運英雄聯盟三朝元老
港隊《英雄聯盟》由上路鄒樹德（YSKM）、打野曾德霖（Holo）、中路伍焯綸（Pretender）、下路李修楠（1xn）、輔助凌啟榮（Kaiwing）和羅智傑（Keres）出戰，並由黃俊謙（Skywalk）擔任教練。而Kaiwing繼2018年雅加達亞運示範項目開始，已連續三屆代表港隊出戰亞運，提到成為三朝元老他則指由2018到現在，不經意間便打到第三屆：「第一屆覺得亞運呢個概念比較新奇，因為嗰陣時冇諗到，原來電競係可以出到去亞運。第二屆比較多係期待，因為第一屆成為正式項目好難忘。到依家我感覺係原來回頭一看已經第三屆，心態嘅轉變就係咁。」
Kaiwing認為對比起平時的隊服，披上港隊戰袍反而更添一份榮耀和歸屬感：「一個榮譽同埋歸屬感啊，即係我會覺得，可能真係我哋成功攞到獎牌啦，咁樣就變成屋企人或者朋友，佢哋見到都會戥我開心啊，或者大家都見到，然後以後會再同其他人講啊、分享啊咁樣。我自己覺得呢一方面對我嚟講係幾有意義。」
默契成港隊最大優勢
Kaiwing超過十年的生涯以極具侵略性的打法和游走觸覺聞名，亦打出不少令人印象深刻的成績，例如去年效力LCP賽區的CFO打入全球總決賽8強，大賽經驗相當豐富，他亦希望可以融合自己效力過各隊的優點和好的打法投放在港隊上。而提到他的經驗可以如何幫助隊伍時，Kaiwing則認為自己除了分享經驗外也可以幫助團隊在溝通上更順暢：「盡量將我自己本身知道嘅嘢，或者本身所擁有任何關於遊戲入面嘅知識，盡量分享出嚟。然後因為到時就用返廣東話去溝通，咁自己就可能會講得再快啲，成個過程會再好啲、流暢啲，睇下會唔會有再好啲嘅效果。」
Kaiwing也認為港隊最大的優勢會是默契：「因為可能我同其他成員之前都同隊過。咁其實嗰陣時我哋已經有好多基礎嘅一啲默契，我相信有呢個默契，可以省略咗好多不必要嘅一啲誤會同磨合嘅過程。」
無悔遠走巴西賽區
去年年尾Kaiwing遠赴巴西聯賽效力VKS，但成績未如理想，最近重回LCP聯賽效力GZ ，提到遠走的決定Kaiwing則表示當時希望可以尋求新的挑戰和想體驗一下當地的文化才下此決定，被問及有沒有後悔的時候Kaiwing則指：「回頭睇其實係冇嘅，因為嗰邊嘅風景同嘢食都好好，同埋成個整體嘅環境，我學到嘅嘢都有收穫，咁樣都 OK算係一個好嘅體驗。」他提到比起溝通或文化，當時最難適應的反而是打法上需要花費較多時間去和隊友磨合。
笑指要駐爆Faker給他一個驚喜
上屆港隊在分組賽中對上手握Zeus、Faker等巨星的韓國，最終以一勝一負無緣晉級，而今屆分組亦有機會再度和韓國隊碰頭，Kaiwing透露有針對每一個地方有相對應的對策，而提到如何對付Faker時，Kaiwing則笑指：「我就早啲推完線，之後推完線我就會住中路，畀一個surprise佢。」
記者/攝影：魏國謙
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
