丈夫有外遇兩老「幫親不幫理」 人妻慘遭「連人帶B」趕走 老爺狠放話惹公憤 網民點醒：新抱永遠係外人｜Juicy叮
以為揭發丈夫偷食，老爺奶奶會主持公道？近日有人妻在網上心酸發文，指滿心以為長輩會講道理，豈料兩老竟然「幫親不幫理」。兩人不但包庇出軌兒子，老爺更惡言相向，最終更狠心把她趕走。網民冷眼旁觀，一語道破「新抱永遠係外人」的事實。詳情見下圖及下文：
丈夫有外遇兩老「幫親不幫理」 人妻慘遭「連人帶B」趕走 老爺狠放話惹公憤 網民點醒：新抱永遠係外人逐張睇↓↓↓↓
揭丈夫出軌 老爺奶奶極速變臉
樓主早前（24日）在社交平台 Threads 發帖，自爆發現丈夫出軌後，原本「好天真以為對方父母知道自己個仔出軌會講道理企我嗰邊」。豈料奶奶得知後，第一反應竟是「一嘢質疑係咪我搞錯咗」，直到樓主拿出證據才「粒聲唔出」。
更令人心寒的是，當樓主與丈夫商討撫養權及贍養費時，老爺竟然衝出來大罵：「一個崩都唔會畀你！」樓主形容老爺當時「仲想打人咁款」，甚至當面數落她生完孩子後情緒有問題，嚇得她當場哭出來。
10年感情清零
樓主大嘆，老爺奶奶在明知她「冇娘家」可以投靠的情況下，依然狠心要求她搬走。她透露，自己很小的時候已經與男方一家同住，至今十多年，「計返分分鐘仲長過我同父母一齊嘅日子，我冇諗過十幾年佢哋反起面上嚟咁恐怖」。
面對夫家的瞬間變臉，樓主感到極度無助，這兩天BB似乎感受到母親的痛苦，哭得特別厲害，令她幾近崩潰：「我係流住眼淚咁餵奶，流住眼淚夾硬擠笑容同佢玩。」同時，她對剛出生的兒子感到無比內疚，大嘆：「我覺得自己好對唔住BB，要令佢喺單親環境生長……」
老爺數落：生完有情緒問題
針對老爺數落她「生完有情緒問題」，有網民冷靜分析：「生完有情緒問題都係身邊嘅人逼出嚟嘅。」此言一出，樓主大表贊同，痛心控訴：「係啊！就生嗰陣唔舒服成日入醫院，先生冇乜嚟探我，就算生咗都係上嚟坐兩、三個鐘就想走人。佢父母帶埋自己親戚直踩醫院，事先講咗唔想有人嚟，我真係冇體力傷口又痛。」
樓主續指，男方家人「生之前話幫手湊，生完原來片都唔識換教極都做錯」，結果剖腹產後第5天的她已經要「烏低身幫BB沖涼」。最令她心淡的是，「BB喊，淨係問我做咩事喊，完全冇打算幫手氹，等等等等等等等，試問要點樣情緒好？」
樓主更透露，老爺奶奶「不嬲係好想要個孫，不過我生完情緒問題佢老竇憎埋個BB」。她表示：「佢哋趕走嘅只係我，不過我走BB當然要走，呢一刻佢哋冇話要個孫留喺度。」
網民：新抱永遠係外姓人
對於樓主期望兩老幫理不幫親，許多網民冷靜點破盲點，強調血濃於水是鐵一般的事實：「人哋先係一家人」、「新抱係外姓人，呢點一定要搞清楚」、「任何時候老竇老母都企自己個仔嗰邊㗎啦，講錢嘅時候更加係」。
網民直言樓主將人性想得太美好：「你天真啫，一離婚就反面，正常呀」、「正常喎，佢父母又唔係生你出嚟嗰個，就算係佢個仔理虧都唔會撐你。」
同路人打氣：單親好過對住嗰家人
面對樓主的內疚與徬徨，大批同路人留言為她打氣，著她「先顧好自己，一步一步慢慢嚟」。有網民直指：「你無對唔住BB，係你老公對唔住個BB先啱！」並勸喻她：「新抱永遠係外人，你自己帶住個細嘅去搵社工幫手啦，單親都好過對住嗰家人嘅。」
不少網民鼓勵她，單親絕對不是問題，直言「大把人單親長大，而家大個咗生活幸福美滿」。網民更暖心安慰：「BB會寧願要一個開心嘅媽咪，都唔會想見到媽咪為咗自己同一個咁樣對佢嘅人夾硬喺埋一齊，將來BB會喺你身上學到點樣保護自己。」
有人寄語樓主：「單親有時不比父母健全差，只要有媽媽的愛，比父母每天爭吵好。最緊要遠離傷害自己的人和事。活好自己的每一天，照顧好小朋友，當走的法律程序照走，當爭取的照爭。你值得有更好的生活。」
資料來源：_1daytwoapplesss_＠Threads
相關閱讀：
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
