【星島專訪】顏米羔人到「中年」重塑人生跑道

【星島專訪】由「顏米羔國際後援會」支持，顏米羔3月1日在加拿大舉辦首次海外見面會×生日派對。「第一次真正同呢邊粉絲見面，梗係開心！平時有在社交平台同『米粉』溝通，成日都會覆留言。原來《中年好聲音》在呢邊都好受歡迎，好多人鍾意睇。」但說到「中年」兩個字，米羔坦言卻曾難以接受：「其實心裡覺得好醜，邊個想背負『中年』呢兩個字？當時真的覺得好有包袱。但現在回想，『中年』呢兩個字都是一種安慰，而且玩得《中年好聲音》那班全部都是差不多年紀。」

記者：草步子

攝影：胡智豪

守住時代的溫度

出生於80年代的米羔，視自己為時代分水嶺的夾心層，希望為兩代人建立一條橋梁。身為攝影師和從事電影幕後製作多年，他認為，80年代是由 analog 轉 digital 的一個交接位，好痛苦。

「早於80年代出生的前輩，可能接受唔到由菲林轉數碼，他們罵到瘋，完全不肯接觸，是封閉式的。相反，有些年輕人卻完全唔知道analog的那種質感、那份溫度。什麼是溫度？藥水就是溫度，是碰得到的，現在所有東西都碰不到。你拿著一筒三十六張的菲林，只剩兩格，你拍嗎？怎樣取捨？」米羔說時帶點無奈。

「我是幾old school的。我怕斷層，我認為以前留低的東西，一定有原因值得存在。如果無人去堅持，大家可能估計唔到後面會發生什麼事，有些東西是不可以沒有的。」他更強調，任何東西都是值得欣賞的，「你可以批評，但批評的背後，你都要先欣賞才批評。你可以唔鍾意，但沒理由未看過就話唔鍾意嘛。」

至於成長背景，顏米羔是家中「孻仔」，有三個家姐。從學生年代開始，他就活躍於「前輩圈子」。「小時候我沒甚同輩朋友，喜歡聽前輩說話，所以我俾人有些『老積』的感覺。我覺得前輩的故事同經驗，有好很多智慧在裡面，慳了我不少時間。」

如今米羔也開始擔當「前輩」角色，分享自己的人生閱歷，穿梭於兩個世代，「我會無條件做好多事情，想同年輕人交流。每一個年代之間，都應該會有一條橋，從一代帶到下一代，承傳落去。」

加國之萬物皆藝術

加拿大對於米羔來說，是從小便嚮往的自然國度。「我好喜歡大自然，細個最鍾意睇那些國家地理、自然生物的紀錄片。我對加拿大的認知，就是好大、好多自然保育的地方，亦有好多獨特的生物，還有楓葉，雖然今次睇唔到，但應該好靚。有幾會我好想去 Safari、去 Wild Camping。」

米羔第一次踏足加拿大，是在Montreal拍電影。「那時朋友做製片，我幫忙做劇照、攝影，在Montreal工作了差不多一個月。那裡很悠閒，像法國一樣，慢活到一個點。那裡有好多音樂酒廊，做完工作，我夜晚會去吃雪茄、聽歌，好正！」

至於多倫多，年半前的短暫到訪只能走馬看花，且錯過了多倫多國際影展。「身為電影人，當然想去一些和電影有關的地方。那次快要到影展了，卻擦身而過。」

今次，米羔竟想挑戰一下真正的寒冬。「最凍試過負十度，在日本。未試過負廿幾度，是什麼概念呢？仲有我想試下在呢邊揸車，我特登考了國際牌，試下在雪地、冰面上點樣揸。」

原來，揸車也是米羔一大興趣。「因為我爸爸是揸貨車的職業司機，所以我由細到大都都好鍾意車，好鍾意那種機械感同操控感。我在香港都是開棍波，亦鍾意玩高卡，而家在內地學飄移，也計劃考個國際認可牌。」

然後，在米羔眼中，駕駛不只是速度，而是藝術。「揸車其實都係融合了藝術。大自然都係藝術，我覺得所有東西都係藝術。就好似我見到窗外飄緊雪，我都會分心，好鍾意那個畫面，很美。」

轉跑道之自我重塑

在《中年好聲音二》脫穎而出後，面對身份轉變，知名度增加，米羔坦言還需要時間適應。「兩年幾了，其實都還未係好唔習慣。尤其有人讚我，我都好像有蟻咬。其實我以前連多謝都唔識講，唔知點樣俾反應。而家我會講多謝，而且會記住對方個樣，希望下次在街上撞番，都可以有禮貌咁打招呼。」

有讚必有彈，米羔對於負評，處之泰然：「我係幾能夠接受負評，如果對我有幫助的話。其實冇人會專登講你唔好，因為佢都係冒險講出來，所以一定唔會有惡意，唔計haters惡意攻擊那些。其他我最在意唔係自己，很多人話我，我都完全沒有反應，我最擔心係我媽咪有反應。我同佢講，唔好因為咁有任何不開心的情緒，根本唔需要，亦冇需要回應，沒什麼值得回應。」

米羔有過一段婚姻，他曾承認，離婚的終局，歸因於自己的藝術家性格脾氣。現在的他，坦言未準備好接受新戀情，「唔敢，整體狀態未ready。」

他停一停，笑說，「我都可能會嚮往，緣份到的話都唔會抗拒，但未必咁welcome囉，我唔會去敲門，又未必會開門… 來到再說吧！現在轉了跑道，由零開始，唔好俾自己分心。我想專注在這個世界留多點腳印，作品 - 就是腳印！」

T05