逐步與「愛人」領展分手｜曾智華

本欄資深讀者，必知由領展（823）上市開始，我已大力呼籲一定要掃，有錢就日日掃，唔夠就每月出糧掃，時為廿年前。上市價為10.3元，香港市民買第一手，更只需9元多，簡直是派錢。鼓勵大家掃的理由好簡單，正如當時某大聲政客高調指出——政府賤賣資產！因安排上市的商場及停車場市值，好易計，只要執靚一下，每股最少值30元！這個，有無數私人商場及停車場市值可參考比較。

平均買入價僅28元

聽我講的老友，有的長揸，有的一升就止賺。我則一直買至50多元才停手，此股雖曾升近百元，也從冇無沽過，一直收息。廿年下來，單單利息已經賺回股價，而持有的平均買入價，為28元。本來可以放着唔理，反正早已歸本，點解決定逐步沽出？無他，因當年買入領展的有利因素，已漸漸消失。

買股票既是一種投資，應放時就放。尤其當息口慢慢下跌，人人以為領展派息高而借還款息低，非常有利時，即會谷高股價，這正好俾機會我趁高出貨，越高越出，初步計劃先出一半。

有三大出貨理由

出貨理由：（一）討厭領展總裁王國龍作風！佢正式是「叫人衝自己鬆」。領展財務緊絀時，游說小股東供股，但自己則一次又一次沽。作為一間公司領導，法律上冇規定你唔准沽，但作為最高領導竟頻頻「棄胡」，看在小股東眼裏，等於對公司冇信心，趁好價鬆人，道德上，完全說不通，我絕對鄙視這種作風，必須劃清界線！

（二）安達臣地盤黑洞。領展早年賺大錢，管理層心雄，開始不務正業，意欲踩過界做發展商。豈料買錯貨，高價購入地基大有問題的安達臣地盤，投資應遠比想像大，加上樓市冧，起好的單位也將變蝕本貨兼不知如何脫手。這個黑洞，仍未有管理層能清楚指出對財務的負面影響。

（三）整體零售飲食業式微。領展做民生生意，商場租戶以零售餐飲業為主，可見將來，都不可能會再有早年的興旺。以上三大原因，令小弟決心與相戀多年的愛人分手。

資深傳媒人 曾智華