【阿濃專欄】睇真啲？

一個人到了某個年紀，視力衰退，即使配了眼鏡，許多事物看起來也是模糊一片，想睇真啲亦不可得。

其實看不清楚有時是一種福氣，睇真啲，盞唔開心。

鏡子裡的容顏何必睇真啲？絕對不會像劉德華、郭富城、林青霞、佘詩曼，比起青春年代的你也差了一大截，倒不如影影綽綽的看到自己的輪廓，還留下多少英俊痕跡、嫵媚神態，差堪告慰。

身邊的老伴何必睇真啲？皺紋多了，牙齒掉了，眼睛混濁了，腰伸不直了……看清楚，難免會學某大畫家那樣評價女友：美人遲暮。老伴宜在黯淡的燈下看，希望看出多少猶存的風韻，勾起當日溫馨的記憶。

已長成的兒女何必睇真啲？表面上對你不錯已經好難得。他們有事業要操心，有兒女要照顧，老人家被放在較後的位置情有可原。讓他們騙騙你，你也騙騙自己。

至親好友何必睇真啲？見面嘻嘻哈哈，隨口說聲第日飲茶！小事情有勞他們大概可以，大劑嘢還是免開尊口為妙。

政壇人物何必睇真啲？睇真之後像樣的恐怕所餘無幾。怕他們假面被扯破之後把心一橫索性做衰人，倒不如扮糊塗讓他們把偽君子一直扮下去。