國泰服務 VS 投資價值｜曾智華
日常最怕聽到的電話，為驚青小股民老友不停問：「碌Sir，呢隻入得未，嗰隻幾時出？」例如3個月前在8.8元分析可考慮買入維他奶（345），結果此股曾升上12.8元，無論長揸短炒，都是上佳選擇。
不過維他奶近日股價回落（回落而成交不大，有特別「含意」！），一群在11、12蚊上車的散戶老友（點解佢哋9蚊時唔買呢？），又嚇到「鼻哥窿冇肉」，頻問應否「止蝕」。呢類應入唔入，應揸想走（或加碼）的冇膽散戶，真係唔知同佢講乜好。
不可抱朝種樹、晚鋸枝心態
另外一隻國泰航空（293）也如是，大家可翻查本欄，去年9月此股在8蚊時，小弟分析（冇鼓勵）非常抵買，因成盤生意正在turnaround，客運量不停上升，貨運也如是。更明顯訊號是將欠政府的債一一清還，前景非常秀麗，個人推斷最少去到12蚊。
當然我講得出，自己也掃入。買股不可以抱有朝種樹、晚鋸枝心態，必須要耐心等收成。結果10月開始嚟料，由8.5元開始升個不停，最高衝向11蚊。近幾日又有班興奮散戶猛Call，問應否止賺，因不停聽見乘客投訴佢哋服務。小弟冇氣答，一概回應：「唔該用吓腦自己諗！」
講到國泰服務，我也曾在去年底赴曼谷時「領嘢」，機長宣布零件出問題，就咁由下午4點開始，分別被困在候機室、航班上及入境範圍共11小時，完全冇食物提供，幾乎餓暈，咁搞法當然火都嚟埋，大力投訴。
國泰夠安全 日後繼續搭
不過日後仍會搭國泰，點解？搭飛機第一考慮係乜？絕對係安全！飛機一出意外，多數全部攬炒。近日一單又一單空難意外發生，在呢個情況下，國泰航空及旗下香港快運，皆被國際權威網站列為全球最安全航空公司之一。
全球共有幾百間航空公司，能成為最安全，單單呢個因素，已要繼續搭，希望佢醒醒定定，將服務都搞到最好啦！相信未來，國泰顧客量仍會不斷提升，合情合理。
因此手上的國泰未破12蚊，絕不沽出！
資深傳媒人 曾智華
相關文章：
特朗普上任四出點火 美股未來兩年跌市機會逾四成 林本利：看看美國哪些人捱不住
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
