【星爺講波 30】患癌艾歷臣：修夫基60年來最佳領隊 連尼加犯眾憎隨時變過街老鼠

不講、不講，還需講，英格蘭入歐國盃決賽後，隨之而來關於英隊嘅話題四方八面湧至，星爺諗住平衡一下，想搵下西班牙隊有乜好料同大家分享，點知摷咗好耐都冇乜好發現，低調到一個點，仲以為西班牙一早出咗局！

英格蘭隊最多人講嘅話題，當然係有關教練修夫基，你話跟紅頂白又好，你話將功抵過都好，喺英隊擊敗荷蘭，再度晉級歐國盃決賽之後，讚揚修帥嘅聲音響遍全英國，從民間到球圈以至皇室成員，全部高度讚揚修夫基，連英國足總都表明立場，指無論英隊是否捧盃，都希望今年底約滿嘅修夫基可以繼續帶領球隊進軍世界盃。

而喺芸芸讚美聲之中，最觸動到星爺嘅，係76歲前英格蘭領隊艾歷臣嘅一番話。

今年一月自揭患有胰腺癌，僅剩大約一年生命的呢位瑞典人表示，儘管近日身體狀況唔多好，星期日佢仍在家中觀看英格蘭對西班牙嘅決賽，並向修夫基送上祝福。

艾歷臣在最新一期《電訊報》專欄結尾寫道：「我認為英格蘭有很大的機會獲勝⋯⋯所有自1966年以來嘗試過但未能贏得重大獎盃的教練都會希望看到這一刻。修夫基，加油，實現我們未能做到的事情吧。」佢還讚揚修夫基比過去60年間包括佢自己和波比笠臣在內嘅所有英格蘭主教練都更好地應對壓力。

雖然幾乎全世界都肯定修夫基嘅功勞，但最少還有一個人無反應——英格蘭前國腳、BBC體育王牌評論員連尼加。

當另一英隊名宿舒利亞都轉軚，大讚修夫基在2-1勝西班牙一仗完場前換入屈堅斯和彭馬係完美調動，但連尼加賽後竟然只讚高比馬恩奴點樣表現出色、點樣前途無可限量，但都唔肯喺英隊連續兩屆殺入決賽後改口風，將修夫基嘅表現視而不見。

連尼加之前狂插修夫基一輪終於有「回報」。據悉，BBC員工對於連尼加在其播客節目上批評修夫基感到「不滿、不舒服和尷尬」。據《每日電訊報》報道，在播客上解說對丹麥的比賽時，連尼加和另一評論員米卡李察士拿著紅酒杯的舉動讓BBC員工感到「羞家」。

星爺都係嗰句，「面就係人地畀，架就係自己丟」，連尼加再唔收起自以為是嘅態度，出嚟講番兩句打完場，我幾敢相信，事件發酵落去，再唔限於BBC內部不滿，隨時變成「全國運動」，到時佢份135萬英鎊嘅評論員年薪都應該泡湯。

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】