【星爺講波 29】修夫基創歷史吐烏氣抵讚 英超市提早打烊撐國家隊

距離2024歐國盃決賽只有三日，隨住兩支冠軍戰球隊先後誕生，話題當然集中喺呢兩支球隊身上，昨天就講咗西班牙16歲新人王耶馬，今日就輪到幾乎做得佢爺爺嘅英格蘭統帥修夫基。

耶馬之所以值得談論，其中一個原因係佢破咗好多「最年輕乜乜」紀錄，而修夫基最多人談論嘅，當然係佢帶領英格蘭嘅表現。

英格蘭雖然小組首名資格出線，16強、8強順利過關，但批評佢嘅聲音從未停過，其中最為人詬病係佢即使擁有英超、西甲和德甲最佳球員在陣，但整體表現差強人意，如果唔係三番四次關鍵時刻天降福將，可能早就執包袱回國。

但經過英格蘭四強賽2-1挫荷蘭入決賽之後，雖然又係險勝，但一向跟紅頂白嘅輿論對佢嘅批評即時靜曬，但都冇大讚修夫基表現，而係將視線轉移到個別球員身上(接後文)。

星爺想講番句公道說話，修夫基表現雖然未盡理想，但接手英軍後立下不少汗馬功勞，佢同耶馬一樣締做咗好多前人做唔到嘅紀錄，淨係呢項「首位英格蘭領隊帶領國家隊連續兩次殺入國際大賽冠軍戰」就前無古人啦，一個唔覺意贏埋冠軍，就真係名流青史，就連英王查理斯三世、王儲威廉都開腔表揚，前者更好幽默咁話：「我鼓勵你們下場不要在最後階段才入球﹑或踢到12碼取勝，我相信全國人民的心率及血壓都會大大減低。」咁到唔抵讚，係咪mean咗啲呀！

講開抵讚嘅，除咗四強贏波功臣奧尼屈堅斯福至心靈嘅關鍵入波，仲有曼聯小將高比馬恩奴(上圖左)，就連接二連三批評修夫基嘅英格蘭名宿連尼加都忍唔住大讚，話佢係「十分出色的球員，他太不可思議了」。星爺十分同意連尼加睇法，高比馬恩奴表現沉著、冷靜，解決了修夫基中場嘅難題，前途和耶馬一樣光明。

最後不得不講英格蘭人對國家足球隊嘅支持實在無得頂，為咗贈興，英格蘭最大連鎖超市集團Tesco在決賽當天(星期日)有特別安排，決定讓旗下全國約1800間便利門店，由一般晚上11:00關門改為7:30(開賽前半小時)，方便員工回家或去酒吧欣賞決賽直播，呢個惠民及支持國家隊做法一樣抵讚。

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。