【星爺講波 28】耶馬橫空出世驚艷球壇 奉勸虛心受教免虎頭蛇尾

嚟到歐國盃第28日，焦點之一梗係最終冠軍花落誰家，到底西班牙會唔會由頭帶到尾成為四屆盟主，抑或荷蘭一搔36年之癢再奪冠軍，或者終於被英格蘭恨到首次捧走歐國盃，答案仲有幾日至有分曉，但今屆球壇最大發現已經有無可爭辯嘅答案——耶馬！

證據？星爺隨手就搵到一大堆，先係一組紀錄。星期二四強大戰法國之前，呢位出生在巴塞羅那附近、母親來自赤道幾內亞、父親來自摩洛哥的16歲小朋友已經係：西班牙聯賽最年輕出場/正選/入球球員、歐聯最年輕正選球員、西班牙國家隊最年輕入球球員、歐國盃最年輕出場球員，比賽之後再加一項，連已故巴西球王比利世界盃/歐國盃最年輕入球球員紀錄都俾佢破埋！

夠未？未夠仲有出名批評尖銳嘅英格蘭名宿連尼加話：「一名超級巨星誕生了，他今場的入球可能是今屆最美妙的！」舒利亞都加句：「不可思議」，連萬人迷都贈番兩句，笑說：「有人需要檢查一下耶馬的身分證，確認他只有16歲，因為我們看到的這一切讓我們相信這個男孩已經25歲了，他已經達到了難以想象的成熟程度⋯⋯他踢波就像踢友誼賽一樣，沒有任何壓力⋯⋯就好像他已經踢了 10 年足球。」

其實早在西班牙1比0戰勝意大利的比賽，有球評家已大讚耶馬表現：「見到美斯的影子！」講開美斯，正如星爺小組賽時講過，歷史會不斷循環，巧合會不停出現，今屆E組便重演1994美國世界盃小組賽4隊同分嘅歷史，要計算得失球差額至決定到出線資格，估唔到呢啲咁巧合嘅事今屆一不離二。

話說耶馬爸爸近日喺Instagram 貼咗幾幅相，相片攝於2007年，地點係巴塞魯營球場更衣室，照片內容係當年20歲嘅美斯幫一個嬰兒沖涼，個BB竟然係耶馬。

負責拍攝嘅攝影師回憶話當年聯合國兒童基金和當地報章安排巴塞球員同一啲小孩拍攝慈善月曆，咁啱喺耶馬居住地區抽獎，又咁啱耶馬家人參加抽獎並中獎，更更啱係結果配對同美斯做拍攝組合。網上唔少人打蛇隨棍上借題發揮，話美斯當時施魔法傳授咗內功畀耶馬，所以耶馬球技至咁勁，仲由此敲定佢係球王接班人咁話！

耶馬作為年輕球員，能夠被人肯定當然開心，但星爺奉勸佢一句，千祈唔好畀一時嘅成功衝昏頭腦，見過唔少自小成名，被喻為乜乜接班人嘅明日之星，被捧到上天後就不可一世，以為球隊無咗佢唔得，缺席練習唔聽指揮時有聽聞，又有啲唔識自愛，爛飲爛賭爛嫖乜都齊，結果表現下滑被人唾棄，由前途無量變前途盡毀。前車可鑑，耶馬務必虛心學習，畢竟踢波並唔係只講球技，想成為球王，仲有好多嘢要學！

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】