【星爺講波 26】四強火併：西班牙開火超強勢進襲 法國好整以暇以守代攻

周二( 9日)：西班牙 Vs 法國 (加東時間下午3:00)

經過咗26日共36場比賽，今屆歐國盃戲肉正式開始，明天率先上演首場四強大戰，由西班牙火併法國，勝方將會跟後日另一場準決賽英格蘭對荷蘭的晉級球隊在7月14日的決賽爭奪冠軍殊榮。

西班牙和法國呢兩支前歐國盃及世界盃盟主，殺入四強之情況可以話截然不同，前者係六組唯一全勝出嘅球隊，16強4-1大破格魯吉亞，八強加時後2-1挫德國，除咗對格魯吉亞曾經因烏龍波短暫落後，全程基本上順風順水，贏東道主德軍都係技術性擊倒，盡顯王者風範！

法國就無咁順利，小組賽首場小勝之後連和兩場，只能屈居奧地利之後以次名出線，16強賽要臨完場靠比利時自己攞烏龍至贏波，八強更係互射十二碼至險勝葡萄牙至避免提早畢業，可以話係一拐一拐進入四強，法軍表現同奪標大熱門之名有好大落差。

講番明日場波，西班牙陣營方面，教練迪拉富安迪必須應對少咗丹尼爾卡華積、拿洛文特和上場被德國主將卻奧斯踢傷至緣盡今屆歐國盃嘅柏迪等三位主將的情況，38歲老將捷西斯拿華斯可能要臨危受命，另外仲有狀態正佳的門將烏尼西蒙、翼鋒尼高威廉斯和小將耶馬，咁嘅人腳，咁嘅狀態，鬥牛兵應該可以延續前幾場波嘅凌厲攻力。

不過，儘管法國王牌麥巴比同前線拍檔相繼啞火，但唔好忘記法國隊有今屆最佳嘅後防，5場比賽計法定時間兼加時都係失咗一個波，要攻破佢哋大門都唔係咁輕易嘅事。

星爺咁睇，歷屆大賽冠軍，極少見到由頭贏到落尾捧埋盃，亦都有唔少初段表現差，憑後勁發力攞冠軍，所以一切往績或之前表現，只可以參考，唔好就咁簡單睇好或睇死佢地往後嘅表現，入得四強就表示實力有番咁上下，只要加小小運氣，任何一隊都有贏波嘅機會。當然，星爺覺得運氣今次喺西班牙嗰邊，加上實力，今場可以順利贏波入決賽。

AI預測：

西班牙 Vs 法國 (下午3:00)

預測賽果：打和

半場比分：西班牙 1-1 法國

全場比分：西班牙 2-2 法國

總入球數：4球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。